უფროსი და წამყვანი მასწავლებლის სტატუსი უვადო არ იქნება

მასწავლებელთა პროფესიული განვითარებისა და კარიერული წინსვლის სქემაში ჩართული პედაგოგების მთავარი კითხვა ბოლო პერიოდში სტატუსის შენარჩუნებას უკავშირდება. „უფროსი მასწავლებლის სტატუსი გახდა უკვე უვადო?“, „როდის გავიგებთ უნდა მოვაგროვოთ სტატუსის შესანარჩუნებლად კრედიტები, თუ არა, სქემაში ცვლილებას თვეებია ველოდებით?“ - მსგავს კითხვებს სვამენ მასწავლებლები. 

მასწავლებელთა პროფესიული განვითარების ცენტრის ხელმძღვანელის მოადგილის მანანა რატიანის თქმით, ე.წ. „უვადო სტატუსი“ არ იარსებებს. ინფორმაციას edu.aris.ge ავრცელებს.

„უვადოდ უფროსი მასწავლებლის სტატუსი არ იქნება, კონკრეტული პირობებით შეიცვლება სტატუსის შენარჩუნების მექანიზმი. დიდი ალბათობით, ამ წლის ბოლომდე მივიღებთ ცვლილებებს. მასწავლებლის სტატუსის შენარჩუნების რეგულაციები, რომელიც დღეს არსებობს განსხვავებული წესით ამოქმედდება. ამას ექნება გარდამავალი პერიოდიც, იქიდან გამომდინარე, რომ ცვლილებები მოხდება სასწავლო წლის შუა პერიოდში. ასე რომ, ამ ეტაპზე მასწავლებლები არ უნდა მიყვნენ და არ უნდა ასრულონ ის მოთხოვნები, რაც სქემაში არის შენარჩუნებასთან დაკავშირებით. დღეს სტატუსის შესანარჩუნებელი საჭიროება მათი მხრიდან არ დგას. რაც შეეხება წინსვლას, სტატუსის ცვლილებას თუ აპირებენ, რა თქმა უნდა, ჩვეულებრივ აგრძელებენ წინსვლას“, - განმარტავს მანანა რატიანი.

დღეის მონაცემებით, სქემაში 501 წამყვანი და 24 381 უფროსი მასწავლებელია გადანაწილებული, მონაცემები ყოველდღიურად იცვლება და საბოლოო შედეგები დეკემბრის თვეში დადგება.