ზაზა სარალიძე ინგოროყვას კლინიკაში გადაიყვანეს

ზაზა სარალიძე შინაგან საქმეთა სამინისტროს შენობიდან ინგოროყვას კლინიკაში გადაიყვანეს. ის პოლიციელზე თავდასხმისათვის დააკავეს. 

ზაზა სარალიძის დაკავებაზე შსს პირველ კომენტარს აკეთებს. ნათია მეზვრიშვილი ამბობს, რომ პოლიციამ ძალიან ბევრჯერ დახუჭა თვალი სარალიძის ქმედებებზე.

"სამწუხარო ფაქტი მოხდა დღეს რუსთაველის გამზირზე, ფაქტობრივად ბოლო თვების განმავლობაში ჩვენ ვნახეთ არაერთი შემთხვევა, როდესაც ზაზა სარალიძე პოლიციის მიმართ სიტყვიერი შეურაცხყოფის ხერხებს მიმართავდა, თუმცა გვესმოდა რა ადამიანურად მისი მდგომარეობა, ამის გათვალისწინებით ფაქტობრივად პოლიცია იდგა და მარტივად, რომ ვთქვათ ამ ყველაფერზე თვალს ხუჭავდა, ვგულისხმობ სიტყვიერი შეურაცხყოფის ფაქტებს, თუმცა დღეს პრაქტიკულად პოლიცია იძულებული გახდა სამწუხაროდ, რომ ემოქმედა, იმიტომ რომ ეს იყო უკვე აშკარა შეურაცხყოფის ფაქტი, აშკარა თავდასხმის ფაქტი, რომელმაც ფაქტობრივად პოლიციას სხვა გზა არ დაუტოვა გარდა იმისა, რომ მის მიმართ იძულების ღონისძიება, დაკავება განხორციელებულიყო", - განაცხადა ნათია მეზვრიშვილმა.

ზაზა სარალიძის დაკავების შემდეგ, პარლამენტის შენობის წინ დედამისი მივიდა. როგორც მარინა ბეგაძემ განაცხადა, ის შიმშილობას იწყებს და მიუხედავად მისი შვილის დაკავებისას აქცია კვლავ გაგრძელდება.

„მართალია, ზაზა დაიჭირეს, მაგრამ მე აქ ვარ, ზაზა მარტო არ არის. მე ვაგრძელებ დღეიდან ყველაფერს იმას, რასაც ზაზა აკეთებდა. ყველანაირად ჩავერთვები აქციაში. ზაზას მხარს ყოველთვის უმაგრებდა ჩვენი ოჯახი და ახლაც გავაგრძელებთ ასე", - აცხადებს ზაზა სარალიძის დედა.

ზაზა სარალიძე დღეს პარლამენტის შენობასთან, როდესაც ის წვიმისგან დასაცავი კონსტრუქციის გაშლას ცდილობდა და რისი საშუალებაც მას სამართალდამცავებმა არ მისცეს. შსს-ს ინფორმაციით, „რუსთაველის გამზირზე, რკინის ჯოხით შეიარაღებული ზაზა სარალიძე თავს დაესხა პოლიციის თანამშრომლებს, რომლებიც სამსახურებრივ მოვალეობას ასრულებდნენ. ზაზა სარალიძემ პოლიციელთა მიმართ ფიზიკური ანგარიშსწორება სასწრაფო დახმარების ავტომანქანაშიც განაგრძო, რომელიც რუსთაველის გამზირზე პოლიციისთვის სამედიცინო დახმარების გასაწევად მივიდა.

შსს-ს ცნობითვე, საპატრულო პოლიციის თანამშრომლებმა ზაზა სარალიძე საქართველოს სისხლის სამართლის კოდექსის 353-ე პრიმა მუხლით პოლიციელზე თავდასხმისთვის დააკავეს, რაც ისჯება თავისუფლების აღკვეთით ვადით ოთხიდან შვიდ წლამდე.

ზაზა სარალიძის დაკავების შესახებ ინფორმაციის გავრცელების შემდეგ, საქართველოს პრეზიდენტობის კანდიდატმა “ევროპული საქართველოდან”, დავით ბაქრაძემ დღეს, 26 ოქტომბერს, პრესკონფერენცია გამართა, სადაც განაცხადა, რომ სარალიძე ხელისუფლების სისტემური უსამართლობის მსხვერპლია.

შეგახსენებთ, რომ ხორავას ქუჩაზე მომხდარი მკვლელობისას მოკლული მოზარდის, დავით სარალიძის მამა, ზაზა სარალიძე უკვე რამდენიმე კვირაა პარლამენტის შენობასთან პროტესტს მართავს. მან აქამდეც რამდენჯერმე რუსთაველზე კარვის გაშლაც სცადა, თუმცა ამის უფლება სამართალდამცველებმა არ მისცეს.

დღეს 19:00 საათზე პარლამენტთან სარალიძის მხარდასაჭერად აქცია გაიმართება.