ანა დოლიძე: ამომრჩეველმა ორიანი დაუწერა და საშემოდგომო გამოაყოლა ქართულ ოცნებას

საპრეზიდენტო არჩევნებს წინასწარ შედეგებს ეხმიანება იუსტიციის უმაღლესი საბჭოს არამოსამართლე წევრი, ანა დოლიძე. დოლიძე ამის შესახებ სოციალურ ქსელში წერს.

"გუშინ ამომრჩეველმა 2-იანი დაუწერა და საშემოდგომო გამოაყოლა ქართულ ოცნებას ზაზა სარალიძის ტკივილისთვის, ვანო ზარდიაშვილის მორალისთვის, აფგან მუხტარლის თბილისიდან გაქრობისთვის, 2008 წლის ომის ჩვენთვის დაბრალებისთვის, მურუსიძის სამართლისთვის, გაღარიბებისთვის და გამდიდრებული ბანკებისთვის, 400-ლარიანი მონური სამსახურებისთვის, მიშვებული პროკურატურისთვის, უღირსი სიბერისთვის, განათლების მაგივრად კანაფის პოპულარიზაციისთვის, თეა წულუკიანის სარკაზმისთვის, სესიაშვილის სასახლისთვის, საკუთარი ბანკირების მინისტრებად დანიშვნისთვის, უშევრობის და აყვავებული ნეპოტიზმისთვის, კობახიძის თავხედობისთვის. წადით ახლა, გადაშალეთ მათემატიკის წიგნი, ციფრებს დახედეთ და იმეცადინეთ", - წერს დოლიძე.

დარგობრივი ეკონომიკისა და ეკონომიკური პოლიტიკის კომიტეტის თავმჯდომარე, უმრავლესობის წევრი რომან კაკულია ამბობს, რომ საპრეზიდენტო არჩევნების შედეგებს მნიშვნელოვანი ანალიზი სჭირდება.  კაკულიას განცხადებით, ქართული ოცნებისთვის ყველაფერი ჯერ დაკარგული არ არის და შესაძლებელია "ყველაფერი თავის ადგილზე დაბრუნდეს".

"ქართული ოცნება - დემოკრატიული საქართველოს" ცენტრალურ ოფისში ბრიფინგი გაიმართა, რომელზეც კახა კალაძემ განაცხადა, რომ მმართველ გუნდს ძალაუფლების კონცენტრაციამ გადაჭარბებული თვითდაჯერებულობა შეჰმატა.

ცესკომ 2018 წლის საპრეზიდენტო არჩევნების წინასწარი შედეგები გამოაქვეყნა, რომლის მიხედვითაც, სალომე ზურაბიშვილს 38.63%, ხოლო გრიგოლ ვაშაძეს 37.74% აქვს. 

არჩევნებში პრეზიდენტობის 25 კანდიდატი მონაწილეობდა. ეს ბოლო საპრეზიდენტო არჩევნებია საქართველოში, როდესაც ამომრჩევლები პრეზიდენტს პირდაპირი წესით ირჩევენ.