ქრთამის აღებისთვის დაკავებული ზუგდიდის ყოფილი ვიცემერის დეპუტატი შვილი გამოძიებას ენდობა

ზუგდიდის დაკავებული ვიცემერის გია გულორდავას შვილი, მაჟორიტარი დეპუტატი გოგა გულორდავა ამბობს, რომ ის გამოძიებას ენდობა. გოგა გულორდავა აცხადებს, რომ გავრცელებულ ჩანაწერში, სადაც სავარაუდოდ ზუგდიდის ყოფილი მერი ლაშა გოგიაა და რომელშიც სავარაუდო კორუფციული გარიგება განიხილებოდა, მამამისი არ ფიგურირებს.

"ბრალს ვიზიარებ თუ არა, ამას გამოძიება დაადგენს და ამისთვის არსებობს შესაბამისი უწყებები და არსებობს სასამართლო. საბოლოოდ ადამიანის ბრალეულობა დგინდება მას შემდეგ, რაც მის მიმართ კანონიერ ძალაში შევა სასამართლოს განაჩენი. არსებობდა ალბათ კითხვები, რადგან ასეთი ფაქტის წინაშე დადგა გამოძიება. ამ კითხვებს ალბათ გაეცემა გამოძიების მხრიდანაც პასუხი და შემდგომ უკვე სასამართლო დაადგენს ბრალეულობას. არანაირი საფუძველი იმისა, რომ გამოძიებას არ ვენდო, არ მაქვს. მაგ ჩანაწერში მამაჩემი საერთოდ არ ფიგურირებდა და იმ ჩანაწერებიდან ეს არ ჩანს. ის თვითონ მონაწილე არ იყო, იყო თუ არა კავშირში არსებულ შინაარსთან - თანხის აღება იყო თუ სხვა გადაცდომა, ამას უკვე გამოძიება გასცემს პასუხს",- განაცხადა გოგა გულორდავამ.

კითხვაზე - მამის დაკავების გამო, მოსალოდნელია თუ არა, რომ გოგა გულორდავა "ქართული ოცნებიდან" წავიდეს, ის პასუხობს, რომ ოჯახის წევრის დაკავება არ იქნება იმის მიზეზი, რომ მან მსგავსი პოლიტიკური გადაწყვეტილება მიიღოს.

"თუ კანონის წინაშე ის არის დამნაშავე, ის ამისთვის აგებს პასუხს. დანარჩენს გამოძიება და საამართლო გვაჩვენებს და მე სრულ ნდობას ვუცხადებსერთსაც და მეორესაც",- აღნიშნა გულორდავამ.

გოგა გულორდავა წალენჯიხიდან ქართული ოცნების მაჟორიტარი დეპუტატია პარლამენტში.

ზუგდიდის ყოფილი მერი და ვიცემერი განსაკუთრებით დიდი ოდენობით ქრთამის აღების ფაქტზე დააკავეს. 

გამოძიებამ დაადგინა, რომ 2018 წლის პირველ ნახევარში, ლაშა გოგიამ და გია გულორდავამ, რომლებიც იმ პერიოდში ზუგდიდის მუნიციპალიტეტის მერის და ვიცემერის თანამდებობებს იკავებდნენ, ქალაქ ზუგდიდში მდებარე გულუას ბაღის და რკინიგზის სადგურის მიმდებარე ტერიტორიების იჯარით გასაცემ აუქციონზე გატანის სანაცვლოდ მოქალაქეს ქრთამის სახით მოსთხოვეს და გამოართვეს განსაკუთრებით დიდი ოდენობით თანხა - 21 500 აშშ დოლარი.

დანაშაული 11-დან 15 წლამდე პატიმრობას ითვალისწინებს.

ლაშა გოგიამ თანამდებობა 12 სექტემბერს დატოვა.

სახელმწიფო უსაფრთხოების სამსახურის ანტიკორუფციულმა სააგენტომ, შესაძლო დანაშაულის გამოვლენის მიზნით, ზუგდიდის მერიის ააიპ „ბოტანიკური ბაღების მართვის ცენტრის" საქმიანობის შესწავლა 16 აგვისტოს დაიწყო.