ბათუმის მოვლენებთან დაკავშირებით კიდევ სამი პირი დააკავეს

ბათუმის მოვლენებთან დაკავშირებით, მასობრივი არეულობისა და პოლიციელებზე, სხვა სახელმწიფო მოხელესა და საჯარო შენობაზე თავდასხმისთვის კიდევ სამი პირი დააკავეს. ამ დროისთვის ისინი წინასწარი მოთავსების იზოლატორში იმყოფებიან. მათთვის ბრალი ჯერ არ წაუყენებიათ.

დაკავებულების აღმკვეთი ღონისძიების შეფარდების საკითხს ბათუმის საქალაქო სასამართლო, სავარაუდოდ, ხვალ განიხილავს.

დაკავებულებს შორის ერთ-ერთი გოდერძი გორგილაძეა, რომელიც ადმინისტრაციული სამართალდარღვევისთვის აქციის ღამეს დააკავეს და 5-დღიან პატიმრობაშიც იმყოფებოდა. 

"როგორც ვაანონსებდი, გოდერძი გორგილაძე დააკავეს. ადმინისტრაციულით ის 5-დღიან პატიმრობაში იყო. გამოშვებისას მისი ტანსაცმელი დაიტოვეს და დალუქეს. ასევე, მიდიოდა საგამოძიებო მოქმედებები და მტკიცბულებების მოპოვება. მოსამართლემ არ გაიზიარა ურთიერსაწინააღმდეგო მტკიცებულებები, როდესაც ადმინისტრაციულით პატიმრობაში დატოვა. გოდერძი თითქმის ყოველდღიურად დადიოდა თურქეთში, გუშინ დამირეკა, რომ საზღვარზე არ უშვედნენ. გვქონდა მოლოდინი, რომ დააკავებდნენ და სისხლის სამართლის საქმეზეც ბრალს წაუყენებდნენ", - განაცხადა გორგილაძის ადვოკატმა, ზაზა პაპიძემ. 

სისხლის სამართლის საქმეზე ამ დროისთვის წინასწარ პატიმრობაში 15 პირია, მათ შორის, ერთი არასრულწლოვანია. კიდევ ერთ არასრულწლოვანს სასამართლომ აღმკვეთი ღონისძიების სახით გირაო შეუფარდა.

საქმეზე საგამოძიებო მოქმედებები გრძელდება. არაა გამორიცხული, დაკავებულების რიცხვი გაიზრდოს.

ბათუმში ვითარება 11 მარტს საღამოს ჭავჭავაძის ქუჩაზე მომხდარი ინციდენტისას დაიძაბა. პოლიციამ 2 მოქალაქე - რამაზ ხიმშიაშვილი და ჯიმი ვარშანიძე დაუმორჩილებლობის ბრალდებით მას შემდეგ დააკავა, რაც პატრულის თანამშრომელმა ერთ-ერთი მათგანი დააჯარიმა, რასაც იქ მყოფ მოქალაქეებსა და პოლიციელებს შორის დაპირისპირება მოჰყვა. პოლიციამ გოგებაშვილის ქუჩაზე მიმდინარე აქციაზე კიდევ 4 პირი დააკავა. მოგვიანებით, აქციამ აჭარის შს სამმართველოსთან გადაინაცვლა, სადაც პოლიციასა და აქციის მონაწილეებს შორის დაპირისპირება რამდენჯერმე მოხდა. აქციის მონაწილეები პოლიციის ეზოში შეჭრას ცდილობდნენ, რის შემდეგაც სპეცდანიშნულების რაზმმა ცრემლსადენი გაზი გამოიყენა.