სესიაშვილი აგვისტოს ომზე: გაფრთხილების მიუხედავად, სააკაშვილმა ეს ნაბიჯი გადადგა

საერთაშორისო თანამეგობრობის გაფრთხილების მიუხედავად, რომ რუსეთის პროვოკაციებს არ წამოგებოდა, მიხეილ სააკაშვილმა ეს ნაბიჯი გადადგა, – ასე ეხმაურება საპარლამენტო უმრავლესობის წევრი ირაკლი სესიაშვილი სოციალურ ქსელში გავრცელებულ არქივის ვიდეოს, სადაც მიხეილ სააკაშვილი აცხადებს, რომ 2008 წლის აგვისტოს დასაწყისში, ცხინვალის რეგიონში სამხედრო მოქმედებების განხორციელების გადაწყვეტილება მისმა ხელისუფლებამ მიიღო. ამის შესახებ 1tv.ge წერს.

„აქ კითხვის ნიშნები არ ჩნდება, თუმცა ისიც უნდა ვთქვათ, რომ სამწუხაროდ, წინა ხელისუფლებამ, უშუალოდ სააკაშვილმა, ითამაშა ის ძალიან ტრაგიკული როლი, რაც შეესაბამებოდა პუტინისა და კრემლის ინტერესებს. ფაქტობრივად, ის გახდა ამ პროვოკაციის თანამონაწილე, ამიტომ ეს ვიდეო ჩემთვის იმ ტრაგიკული მოვლენების კიდევ ერთხელ გახსენებაა. ეს არის იმის დადასტურება, რომ საერთაშორისო თანამეგობრობის გაფრთხილების მიუხედავად, რომ რუსეთის პროვოკაციებს არ წამოგებოდა, სააკაშვილმა ეს ნაბიჯი გადადგა“, – განაცხადა ირაკლი სესიაშვილმა.

მისი თქმით, ოკუპაციასთან დაკავშირებით კითხვები არ ჩნდება, არამედ აქ საუბარია იმ უპასუხისმგებლო, არასწორ მოქმედებებზე, რამაც რუსეთის მხრიდან საქართველოს ტერიტორიების ოკუპაციამდე მიგვიყვანა.

"ნაციონალური მოძრაობის" პრეზიდენტობის კანდიდატმა გრიგოლ ვაშაძემ აგვისტოს ომის თაობაზე საქართველოს ყოფილი პრეზიდენტის მიხეილ საააკაშვილის განცხადებაზე კომენტარი გააკეთა. როგორც ვაშაძემ თქვა, სააკაშვილმა სამხედრო მოქმედებები დაიწყო, როგორც პასუხი რუსულ აგრესიაზე.

2008 წლის აგვისტოში რუსეთ-საქართველოს ხუთდღიანი ომის შედეგად, საქართველომ დაკარგა თავისი ტერიტორიების 20%, მათ შორის ის ტერიტორიებიც, რომლებსაც ომამდე საქართველოს ხელისუფლება აკონტროლებდა.