სამართლიანი არჩევნები: მუქარა რომელზეც სალომე ზურაბიშვილი საუბრობს, სისხლის სამართლის დანაშაულია

არასამთავრობო ორგანიზაცია სამართლიანი არჩევნები შინაგან საქმეთა სამინისტროს მოუწოდებს, დროულად და ეფექტიანად მოახდინოს რეაგირება და მაქსიმალურად სწრაფად გამოიძიოს სალომე ზურაბიშვილზესავარაუდო მუქარის ფაქტი, - ამის შესახებ ორგანიზაციის ოფიციალურ Facebook-ზე განაცხადეს.

„სამართლიანი არჩევნების“ შეფასებით, მუქარა, რომელზეც პრეზიდენტობის კანდიდატი საუბრობს,  სისხლის სამართლის დანაშაულს წარმოადგენს.

„სამართლიანი არჩევნები“ ეხმაურება საქართველოს პრეზიდენტობის კანდიდატის, სალომე ზურაბიშვილის დღევანდელ განცხადებას, რომლის მიხედვითაც 9-10 და 11 ნოემბერს მას და და მის შვილებს, სმს და ხმოვანი შეტყობინებებით, სიცოცხლის მოსპობით დაემუქრნენ. კანდიდატის განცხადებით, მუქარა რეალურია, ვინაიდან, მისი თქმით, მუქარის ავტორები იდენტიფიცირებულნი არიან, როგორც ყოფილი სამხედროები, რომლებიც, საკუთარი სტატუსებიდან გამომდინარე, დაკავშირებულნი არიან ”ნაციონალურ მოძრაობასთან“.

მუქარა, რომელზეც პრეზიდენტობის კანდიდატი საუბრობს, წარმოადგენს სისხლის სამართლის დანაშაულს. მოვუწოდებთ შინაგან საქმეთა სამინისტროს, დროულად და ეფექტურად მოახდინოს რეაგირება და მაქსიმალურად სწრაფად გამოიძიოს სავარაუდო მუქარის ფაქტი. „სამართლიანი არჩევნები“ აქამდეც შეშფოთებას გამოხატავდა პოლარიზებული საარჩევნო გარემოსა და მზარდი აგრესიული რიტორიკის გამოვლენის ფაქტებზე“, – ნათქვამია განცხადებაში.

ორგანიზაცია კიდევ ერთხელ მოვუწოდებთ არჩევნებში ჩართულ სუბიექტებსა და მათ მხარდამჭერებს, თავი შეიკავონ ნებისმიერი ისეთი ქმედებისა და განცხადებისაგან, რომელმაც შესაძლოა, გამოიწვიოს საარჩევნო გარემოსთვის ძალადობრივი ფონის შექმნა.

„ახალგაზრდა იურისტთა ასოციაციაში“ აცხადებენ, რომ მათ დღეს, სალომე ზურაბიშვილთან 16:00 საათზე დაგეგმილი აქვთ შეხვედრა, სადაც აღნიშნულ საქმეზე დეტალურ ინფორმაციას მიიღებენ.

„დღეს გაკეთებულ განცხადებას რაც შეეხება, შევისწავლით საქმეს და კომპეტენციის ფარგლებში დავაკვირდებით. თუმცა, მანამდე აღვნიშნავთ, იქიდან გამომდინარე, რომ ეს არის სავარაუდო მუქარის შემცველი ტექსტები, აუცილებელია სამართალდამცველებმა მოახდინონ რეაგირება.

"ქართული ოცნების" მიერ მხარდაჭერილმა დამოუკიდებელმა საპრეზიდენტო კანდიდატმა სალომე ზურაბიშვილმა დღეს ბრიფინგი გამართა და განაცხადა, რომ 9, 10 და 11 ნოემბერს მას და მის შვილებს შეტყობინებები გაუგზავნეს, სადაც ნათლად იყო გამოხატული სიცოცხლის მოსპობის მუქარა. „შუბლს გაგიხვრიტავ, თქვენს სისხლს დავლევ“, - ზურაბიშვილმა მუქარის შემცველი სიტყვების ციტირება გააკეთა.