ზალკალიანი: ევროპარლამენტის შეფასებები 21 ნოემბერს ბრიუსელში დაგეგმილი შეხვედრის წარმატებაზე მიანიშნებს

სკანდინავიურ ქვეყნებში ვიზიტით მყოფი საქართველოს საგარეო საქმეთა მინისტრი დავით ზალკალიანი დღეს ევროპარლამენტის რეზოლუციას გამოეხმაურა.

დავით ზალკალიანის განმარტებით, ეს რეზოლუცია არის კიდევ ერთი დასტური იმისა, რომ საქართველოს ხელისუფლების მიერ განხორციელებული რეფორმები, დემოკრატიული, პოლიტიკური და ეკონომიკური კუთხით არის უაღრესად წარმატებული.

„ჩვენ ვართ შეფასებული რეგიონში და აღმოსავლეთ პარტნიორობის ქვეყნებს შორის, როგორც კაშკაშა ვარსკვლავი დემოკრატიული რეფორმების და პოლიტიკური რეფორმების განხორციელების კუთხით. უაღრესად მნიშვნელოვანია, რომ საქართველომ მიიღო უმაღლესი შეფასება ასოცირების ხელშეკრულების იმპლემენტაციის თვალსაზრისით. ჩვენ გვაქვს მართლაც სამაგალითო შესრულება ყველა ძირითად მიმართულებაზე.

ეკონომიკური განზომილებით, ასევე დემოკრატიული ინსტიტუტების გაძლიერების კუთხით. უკანასკნელი არჩვენების პირველი ტურიც, რომელიც ჩატარდა, იყო კიდევ ერთი დასტური და გამოვლინება, რომ საქართველო მტკიცედ და თანმიმდევრულად დგას დემოკრატიული ინსტიტუტების განვითარების და განმტკიცების გზაზე.

ეს არის მართლაც ძალიან მნიშვნელოვანი მოვლენა და კიდევ ერთი აღიარება საქართველოსი და იმ შრომის და საქმიანობის, რომელსაც ჩვენი ხელისუფლება, დიპლომატიური კორპუსი, აღმასრულებელი ხელისუფლება და პარლამენტი საქართველოს რაც შეიძლება უკეთ წარმოჩენის თვალსაზრისით საერთაშორისო თანამეგობრობის თვალში. რაც მთავარია ჩვენი ევროპელი პარტნიორებისთვის და შედეგმაც არ დააყოვნა, რადგანაც ჩვენ გვაქვს მართლაც უპრეცედენტოდ მაღალი დონის მხარდაჭერა“, - განაცხადა საგარეო საქმეთა მინისტრმა.

მინისტრის განცხადებით, ევროპარლამენტის შეფასებები და საქართველოს პროგრესი იძლევა საფუძველს, რომ 21 ნოემბერს ბრიუსელში დაგეგმილი შეხვედრა იქნება უაღრესად წარმატებული.

21 ნოემბერს ბრიუსელში საქართველოს პრემიერმინისტრი მამუკა ბახტაძე დელეგაციასთან ერთად, ევროკომისიის პრეზიდენტს ჟან კლოდ იუნკერს შეხვდება. უმაღლესი დონის შეხვედრაში მონაწილეობას მიიღებს ე.წ. კომისრების კოლეჯიც.