ვოლსკი: ევროპული საქართველო ქერჩის თემით სპეკულირებს

"ეს რეგიონული უსაფრთხოებისთვის სერიოზული გამოწვევაა და პირდაპირ ეხება საქართველოს“, - ამის შესახებ პარლამენტის ვიცესპიკერმა გია ვოლსკიმ უკრაინაში განვითარებულ მოვლენებთან დაკავშირებით განაცხადა. მისი თქმით, რეგიონში შექმნილია საგანგებო მნიშვნელობის საფრთხე. გია ვოლსკი „ევროპული საქართველოს" მიერ შემუშავებულ რეზოლუციის პროექტსაც გამოეხმაურა და აღნიშნა, რომ „ევროპული საქართველო" ამ თემით სპეკულირებს. ინფორმაციას სააგენტო "ინტერპრესნიუსი" ავრცელებს.

„ეს არ არის თემა, რომელიც მხოლოდ უკრაინას ეხება. ეს რეგიონული უსაფრთხოებისთვის ძალიან სერიოზული გამოწვევაა და პირდაპირ ეხება საქართველოს, როგორც შავი ზღვის ქვეყანას. აქედან გამომდინარეობს ჩვენი პოზიციაც, რომელიც სრულად ეთანხმება საერთაშორისო დამოკიდებულებას. საქართველოს შეუძლია კიდევ ერთხელ გაუსვას ხაზი იმას, რომ სტაბილურობა ჩვენი ქვეყნისთვის საგანგებო მნიშვნელობისაა.

რაც შეეხება, „ევროპული საქართველოს" მიერ შემოთავაზებულ რეზოლუციას, მე არ ვიცი რამდენად მოესწრება ახლა ამის გაკეთება. "ევროპული საქართველო" როგორც ყოველთვის, ამ თემით სპეკულირებს და პოლიტიკურ ჩარჩოში სვამს. ისე, რასაკვირველია სერიოზული მსჯელობაა საჭირო. საკმაოდ დამაფიქრებელი ვითარებაა რეგიონში შექმნილი. გამოხატული იქნება თუ არა ეს რეზოლუციით, ამას მე მხოლოდ ჩემს თავზე ვერ ავიღებ, მაგრამ პოზიცია რასაკვირველია იგივეა, რაც მთელ მსოფლიოს აქვს ამასთან დაკავშირებით. საფრთხე ჩვენთვის საგანგებო და მნიშვნელოვანია", - განაცხადა გია ვოლსკიმ.

"ევროპულმა საქართველომ" რეზოლუციის პროექტი შეიმუშავა, რომელიც უკრაინაზე რუსეთის ფედერაციის სამხედრო აგრესიის აქტს შეაფასებს. გიორგი კანდელაკის თქმით, მნიშვნელოვანია, რომ საქართველოს პარლამენტმა ამ საკითხთან დაკავშირებით სწრაფი რეაგირება მოახდინოს.

ქერჩის სრუტეში მომხდარ კონფლიქტს საქართველოს საგარეო საქმეთა მინისტრი დავით ზალკალიანი, ასევე შერიგებისა და სამოქალაქო თანასწორობის საკითხებში სახელმწიფო მინისტრი ქეთევან ციხელაშვილი გამოეხმაურნენ. მათ რუსული აგრესია დაგმეს და უკრაინას მხარდაჭერა გამოუცხადეს.

უკრაინის პრეზიდენტმა მეზღვაურებისა და გემების უკრაინისთვის დაუყოვნებლივი გადაცემა მოითხოვა. ეს იქნება პირველი ნაბიჯი აზოვის ზღვაზე სიტუაციის დეესკალაციისთვის. პოროშენკომ ხაზი გაუსვა იმას, რომ მოსკოვისგან პასუხს ელოდება. სამი უკრაინელი სამხედრო ქერჩის ერთ-ერთი საავადმყოფოშია. 

26 ნოემბერს გამთენიისას, ქერჩის სრუტეში რუსეთის საზღვაო ძალებმა სამი უკრაინული გემი დააკავეს. რუსეთის სასაზღვრო სამსახურმა უკრაინელი მეზღვაურები საზღვრის უკანონო გადაკვეთაში დაადანაშაულა, ხოლო უკრაინამ რუსეთის მოქმედებას აგრესიის აქტი უწოდა. უკრაინის პრეზიდენტმა პეტრო პოროშენკომ 60 საათის განმავლობაში სამხედრო მდგომარეობის გამოცხადებას დაუჭირა მხარი. შესაბამისს კანონპროექტს უმაღლესი რადა გადახედავს.

რუსეთმა ქერჩის სრუტის ინციდენტის გამო 26 ნოემბერს გაეროს უშიშროების საბჭოს საგანგებო სხდომა მოითხოვა.