რადას დეპუტატმა მისი საქართველოში დაკავების შესახებ ინფორმაცია უარყო

თბილისში პარტია „სამოპომოშის“ დეპუტატის, სემიონ სემენჩენკოს დაკავების შესახებ ინფორმაცია ყალბია, - ამის შესახებ თავად სემენჩენკომ სოციალურ ქსელში დაწერა. 

„ინფორმაცია იმის შესახებ, რომ მე ვინმემ დამაკავა, ყალბია. ინფორმაცია, რომ მე საქართველოდან გადამაფრინეს გაურკვეველი მიმართულებით, ასევე ყალბია“, - განაცხადა სემენჩენკომ.

გუშინ უკრაინის პრეზიდენტის, პეტრო პოროშენკოს მრჩეველმა იური ბირიუკოვმა სოციალურ ქსელში დაწერა, რომ სპეცოპერაციისას დაკავებულ უკრაინის მოქალაქეებთან ერთად, თბილისში, პარტია „სამოპომოშის“ დეპუტატი სემიონ სემენჩენკო იმყოფებოდა.

თბილისში უკრაინის 7 მოქალაქის დაკავების ფაქტი ოფიციალურად დადასტურდა.მათგან სამის ვინაობა „ქრონიკისთვის“ ცნობილი გახდა. როგორც გაირკვა, ისინი უკრაინაში მებრძოლი სამხედროები - იგორ ორლენკო, იური კოროსტელოვი და როლანდ მელია არიან. მანამდე ცნობილი გახდა, რომ დაკავებულთა შორის არის ლუკა ჩხეტიაც, რომელიც უკრაინაში ბატალიან „დონბასის“ წევრია.

ამ ეტაპზე გამოძიება დაწყებულია საქართველოს სსკ-ის 236-ე მუხლის მე-3 და მე-6 ნაწილებით, რაც ჯგუფურად ცეცხლსასროლი იარაღის, საბრძოლო მასალის, ფეთქებადი მოწყობილობის მართლსაწინააღმდეგო შეძენა-შენახვას გულისხმობს.

საპარლამენტო უმრავლესობას აინტერესებს, რატომ დაემთხვა უკრაინიდან 7 პირის ვიზიტი ნაციონალების აქციის დღეს.