EMC და საია კარვის გაშლაზე სარალიძის სარჩელის განხილვის შეწყვეტას სააპელაციოში გაასაჩივრებენ

თბილისის საქალაქო სასამართლომ შსს-ს წინააღმდეგ ზაზა სარალიძისა და მალხაზ მაჩალიკაშვილის სარჩელის განხილვა შეწყვიტა. მოსარჩელეები რუსთაველზე, პარლამენტის მიმდებარე ტერიტორიაზე შეკრების უფლებისა და კარვის განთავსების შეზღუდვას აპროტესტებდნენ. სასამართლოს გადაწყვეტილებას ადამიანის უფლებების სწავლებისა და მონიტორინგის ცენტრი (EMC) გამოეხმაურა.

„სასამართლომ შეცვლილი ფაქტობრივი გარემოებების გათვალისწინებით, იმის გამო რომ დღეის მდგომარეობით რუსთაველის გამზირზე განთავსებულია რამდენიმე კარავი და აქციის ორგანიზატორებს არ ეზღუდებათ უფლების რეალიზაციის ეს ფორმა, მიიჩნია, რომ  არ არსებობდა 26 სექტემბერს მოპასუხეთა მიერ განხორციელებული ქმედებების სამართლებრივი შეფასების კანონიერი ინტერესი და ადმინისტრაციული საპროცესო კოდექსის შესაბამისად,  შეწყვიტა სამართალწარმოება.

დასაბუთებული განჩინების არარსებობის პირობებში,  რთულია სასამართლოს მსჯელობის სრულფასოვანი ანალიზი, თუმცა EMC მიიჩვენს, რომ სასამართლოს მიერ ნორმის მსგავსი განმარტება და ინტერპრეტაცია ეწინააღმდეგება სამართლებრივი სახელმიწფოსა და ხელისულფების დანაწილების კონსტიტუციურ პრინციპს. მსგავსი პრაქტიკა შინაარსის გარეშე ტოვებს სასამართლოს მხრიდან, აღმასრულებელი ხელისუფლების მიერ განხორციელებული მმართველობითი ღონისძიების კონტროლის ფუნქციასა და მოქალაქის ინტერესს, სასამართლო გზით დადგინდეს კონსტიტუციით გარანტირებული უფლების შეზღუდვის უკანონობა“ - წერია განცხადებაში. 

EMC და ახალგაზრდა იურისტთა ასოციაცია სასამართლოს აღნიშნული განჩინების გასაჩივრებას თბილისის სააპელაციო სასამართლოში გეგმავენ.