თაკო ჩარკვიანი კახა კალაძის გადადგომას ითხოვს

ოპოზიციის წარმომადგენელი თაკო ჩარკვიანი დედაქალაქის მერი კახა კალაძის თანამდებობიდან გათავისუფლებას ითხოვს. როგორც 1tv.ge წერს, ამის შესახებ თაკო ჩარკვიანმა დღევანდელ ბრიფინგზე განაცხადა.

„დღეს შევიკრიბეთ ქალაქის ჩემთვის უკვე ბრჭყალებში, ქალაქის მერის შემზარავი ანტისახელმწიფოებრივი განცხადების გამო, რომელიც ორი საათის წინა გაკეთდა, მან პრაქტიკულად მოახდინა შემდგომი ესკალაცია და მოუწოდა პრაქტიკულად დაჯგუფებებს მომავალი ოჯახის შევიწროებისკენ. ციტატა მისი განცხადებიდან – „რასაც დასთესავ იმას მოიმკი”, ამას ცხადია, გაგრძელება ექნება და ჩვენ უკვე საერთაშორისო ორგანიზაციებს შევატყობინებთ ყველაფერს”, – განაცხადა თაკო ჩარკვიანმა.

როგორც ჩარკვიანი აცხადებს, მისი ოჯახი მოსალოდნელი დარტყმის ქვეშ აღმოჩნდა, რადგან კახა კალაძემ ბოროტმოქმედება „გააპრავა“.

„კალაძის თანამშრომელია დავით მაჭავარიანი, რომელიც ამ ინციდენტის ერთ-ერთი ორგანიზატორი იყო, ეს არის დავით მაჭავარიანი, რომელიც არის თბილისის საკრებულოს პროტოკოლის უფროსი. რაც შეეხება გორგოძეს, ყმაწვილი, რომელიც „ბანდერლოგად“ ყავდათ ის შემდეგ ჩაერთო, დამწყები გახლავთ კერვალიშვილი. დავით მაჭავარიანი ახდენდა ამის ესკალაციას. კადრებიც ჩანს ეს ყველაფერი. ჩანს, მაჭავარიანს როგორ მოსდის კონფლიქტი ჩემს მეუღლესთან. მოგვიანებით ჩანს, როგორც აჩერებს მართვად გორგოძეს, აჩერებს, რადგან აღარ სურს გორგოძე აღმოჩნდეს ცუდ მდგომარეობაში. ჩემს მეუღლეს მოუწია ხუთი ადამიანის გამკლავება. ჩემს მეუღლეს მოუწია ოჯახის დაცვა. ამ ინციდენტზე კიდევ უარესი იყო ქალაქის მერის განცხადება, ეს არის კატასტროფა, არასახელმწიფოებრივი გამოსვლა, – განაცხადა ჩარკვიანმა.

მანამდე კახა კალაძემ კომენტარი გააკეთა აეროპორტში მომხდარ ინციდენტზე, რომელშიც თბილისის საკრებულოს თანამშრომელი დავით მაჭავარიანი ფიგურირებს.

„დათო მართლაც უპატიოსნესი ადამიანია. წლების განმავლობაში საკრებულოს პროტოკოლის უფროსია. მასზე მხოლოდ კარგის თქმა შემიძლია. ძალიან ცუდი ფაქტი მოხდა. ძალადობა არავისთვის მისაღები არ არის, თუმცა ძალიან სამწუხაროა ის, რაც მთელი საარჩევნო პერიოდში ხდებოდა. როგორი ბილწსიტყვაობა მიდიოდა, პირდაპირი ეთერიდან დედის გინებაზე იყვნენ გადასულები. არავის უნდა გაუკვირდეს, რომ ამის შემდეგ ვიღაცა ვიღაცას შეურაცხყოფას მიაყენებს, კატეგორიულად მიუღებელია ეს მიდგომა. ტელევიზორს ბავშვები და მოზარდები უყურებენ. ეს აგრესია, განცხადებები და ბილწსიტყვაობა შემდეგ ახალგაზრდებზეც და საზოგადოებაზეც გადადის. პოლიტიკოსები უნდა ვიყოთ პირველი, რომ ამ ყველაფერზე უარი ვთქვათ. შესაძლოა ამა თუ იმ საკითხზე განსხვავებული მოსაზრებები და განსხვავებული პოლიტიკური შეხედულებები გვქონდეს, თუმცა ამისთვის დებატები უნდა იყოს და არა დედის გინება, ბილწსიტყვაობა და შეურაცხყოფები. რასაც დასთეს იმას მოიმკი, ხომ იცით ეს გამონათქვამი“, – განაცხადა თბილისის მერმა.

1 დეკემბერს თაკო ჩარკვიანსა და მის მეუღლეზე თავდასხმის ფაქტზე 4 პირი დააკავეს.