ია მეტრეველი: ბუტას უბედურება პოლიტიკურ თემად სააკაშვილმა აქცია

ბუტა რობაქიძის დედა ია მეტრეველი, დღევანდელ სასამართლო განაჩენთან დაკავშირებით, ნაციონალური მოძრაობის შეფასებებს გამოეხმაურა. ისინი აცხადებენ, რომ გადაწყვეტილება პოლიტიკური ნებით გამოცხადდა.

„პოლიტიკური სწორედ სააკაშვილმა გახადა ბუტას უბედურება. მთელი სისტემა იყო ჩართული ამ ტრაგედიაში. არ აკმარეს ბავშვს სიკვდილი და ბანდიტადაც გამოაცხადეს... ამ საქმეში ჩართული იყო მთელი სახელმწიფო მანქანა, მინისტრიდან დაწყებული დამთავრებული ვითომ ჟურნალისტი დონაძით, რომელიც ხელმძღვანელობდა ყველაფერს. აი იქ იყო ზუსტად ყველაფერი პოლიტიკური. მათ გახადეს ეს საქმე პოლიტიკური“, - განაცხადა მეტრეველმა გადაცემაში „პირისპირ“.

 მისივე თქმით, ის აპირებს მიმართოს შინაგან საქმეთა მინისტრს და მოითხოვოს პატრულის იმ თანამშრომელთა პასუხისმგებლობა, რომლებმაც ბუტა რობაქიძის და მისი მეგობრების აყვანის ოპერაციაში მიიღეს მონაწილეობა და დღეს ისევ აგრძელებენ ამ სისტემაში მუშაობას.

დღეს ბუტა რობაქიძის საქმეზე მოსამართლემ ყველა ბრალდებულის მიმართ გამამტყუნებელი განაჩენი გამოიტანა.

ზაზა ბაქრაძეს სასჯელის სახით პირობითი მსჯავრი 4 წლის და 6 თვის წლის ვადით განესაზღვრა, ასევე ჯარიმა 5000 ლარის ოდენობით და 2 წლის ვადით თანამდებობის დაკავების უფლება ჩამოერთვა.

გურამ დონაძეს 5 წლით და 3 თვით ვადით თავისუფლების აღკვეთა მიესაჯა, და მას  2 წლით და 3 თვით თანამდებობის დაკავება აეკრძალა.

დავით იაშვილს 5 წლით 3 თვით თავისუფლების აღკვეთა მიესაჯა და თანამდებობის დაკავება 2 წლით და 3 თვით აეკრძალა.

ზურა მიქაძეს 6 წლით და 3 თვით თავისუფლების აღკვეთამიესაჯა და თანამდებობას 2 წლით და 3 თვით ვერ დაიკავებს.

ირაკლი ფირცხალავას 5 წლით და 3 თვით პატიმრობა მიესაჯა, და 2.3 წლით თანამდებობას ვერ დაიკავებს. 

გურამ დონაძე, დავით იაშვილი და ზურაბ მიქაძე დარბაზშივე დააკავეს სასამართლოს მანდატურებმა. 

განაჩენის გამოცხადებას სასამართლოში დაპირისპირება მოჰყვა.