ხორავას ქუჩის საქმეზე დაკავებული დ.ღ.-ს მამა ამბობს, რომ მისი შვილი პოლიტპატიმარია

ხორავას ქუჩის საქმეზე ცრუ ჩვენების მიცემის ბრალდებით დაკავებული არასრულწლოვნის დ.ღ.-ს მამა კახა ღლონტი აცხადებს, რომ მისი შვილი უკანონოდ არის დაჭერილი და პოლიტპატიმარია. ამის შესახებ მან პრესკონფერენციაზე თქვა. ინფორმაციას სააგენტო "ინტერპრესნიუსი" ავრცელებს.

ღლონტის თქმით, მისი შვილი მაშინ დააკავეს, როდესაც ზაზა სარალიძემ პროკურატურის ეზოში შიმშილობა დაიწყო. დ.ღ-ს დაკავებით კი, ღლონტის თქმით, საზოგადოებრივი მუხტისა და სარალიძის რაღაც დროის განმავლობაში გაჩერება უნდოდათ.

"პროკურორმა ბესიკ ქვარცხავამ ერთ-ერთი სხდომის შემდეგ თქვა, ოთხმა მოწმემ პირდაპირ დაადასტურა ბრალდებულის ბრალეულობაო. არადა, იმ ოთხ მოწმეს საერთოდ არაფერზე უსაუბრია იქ. ამის ოქმი გვაქვს ეს ჰაერზე მოტანილი ლაპარაკი არ არის. პირდაპირ გამოდიან და იტყუებიან, ამას მოსამართლე ძალიან მშვიდად უყურებს. ყველაფერი გადაწყვეტილია, მოსამართლესაც გადაწყვეტილი აქვს ყველაფერი.

საინტერესოა ერთი ფაქტიც, რომ სხდომის ოქმი სახალხო დამცველსაც გადავეცით, იქიდან წერილი მივიღეთ, აქ არაფერი ისეთი არ მომხდარაო. თითქოს, ყველა შეთანხმებულია, რომ ეს ბავშვი დაისაჯოს. ამით სხვისი დანაშაულის დაფარვას ცდილობენ. ნახევარი პროკურატურა დასაჭერია.

ხომ შეიძლებოდა, გამოეშვათ და პროცესებზე სახლიდან ევლო, მაგრამ არა, იქ უნდა იჯდეს და დაისაჯოს. მთავარი მოწმეები არ მოჰყავთ. საპარლამენტო კომისია ლაპარაკობს, რომ საქმე ცუდად არის წარმოებული.

ნახეს დაბალი ღობე დ.ღ. და აწმენდენ ხელს, ატყუებენ საზოგადოებას", - განაცხადა კახა ღლონტმა.

დ.ღ. ივლისში დააკავეს. გამოძიების ინფორმაციით, არასრულწლოვანი ფაქტობრივ გარემოებებთან დაკავშირებით ესაუბრა მოკლული დავით სარალიძის მამას, თუმცა, შსს-ს ცნობით, სასამართლო განხილვის სტადიაზე მან მსგავსი შეხვედრა და საქმის ფაქტობრივ გარემოებებზე საუბარი უარყო.

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.

ასევე საქმის ძიება მიმდინარეობს ფარულ აუდიოჩანაწერებთან დაკავშირებით, რომელიც ციხეში პატიმრობაში მყოფ მირზა სუბელიანთან გაკეთდა.