რამდენი ადამიანი დაჯარიმდა თბილისის დანაგვიანებისთვის 2018 წელს. სტატისტიკა

თბილისის მერიის მუნიციპალური ინსპექციის სამსახურმა 2018 წლის განმავლობაში 2 კილოგრამამდე მუნიციპალური ნარჩენით გარემოს დანაგვიანებაზე ფიზიკურ პირებზე 2222 ჯარიმა გამოწერა. ამის შესახებ imedinews-ის მიერ თბილისის მერიიდან გამოთხოვილ ინფორმაციაში წერია.

ფიზიკურ პირებზე გამოწერილი ჯარიმების მოცულობა 178 060 ლარია. განმეორებით გარემოს დანაგვიანებისთვის კი ფიზიკურ პირებზე 5 ჯარიმა დაიწერა, ჯამში 800 ლარის ოდენობით. 

2018 წლის განმავლობაში ინსპექციამ 15 ორგანიზაცია დააჯარიმა, ჯამში 1200 ლარის ოდენობით. განმეორებით გარემოს დანაგვიანებისთვის კი 1 ორგანიზაცია დაჯარიმდა, 160 ლარით.

შენობა-ნაგებობიდან ნაგვის გადაყრისთვის ფიზიკურ პირებზე 8 ჯარიმა დაიწერა, ჯამში 800 ლარის. ასევე დაჯარიმდა 1 ორგანიზაცია 100 ლარით.

ავტოსატრანსპორტო საშუალებიდან ნაგვის გადაგდებისთვის 68 ჯარიმა დაიწერა, ჯამში 8 120 ლარის.

ცხოველური ფეკალიებით გარემოს დანაგვიანებისთვის 1 ჯარიმა გამოიწერა, და პირი 50 ლარით დაჯარიმდა. 

თბილისის მერიიდან გამოთხოვილ ინფორმაციაში ასევე საუბარია, რომ 2 კილოგრამზე მეტი მუნიციპალური ნარჩენით გარემოს დანაგვიანებისთვის 9 ორგანიზაცია ჯამში 4500 ლარით დაჯარიმდა, მათგან განმეორებით გარემო ერთმა დაანაგვიანა, რისთვისაც 1000 ლარით დაჯარიმდა.

2 კილოგრამზე მეტი ნარჩენით გარემოს დაბინძურებისთვის ფიზიკურ პირებზე 14 ჯარიმა გამოიწერა, ჯამში 2100 ლარის ოდენობით. 

1 კუბურ მეტრზე მეტი სამშენებლო ნარჩენით გარემოს დანაგვიანებისთვის თბილისის მუნიციპალური ინსპექციის სამსახურმა 2018 წლის განმავლობაში 38 ჯარიმა გამოწერა, ჯამში 54 000 ლარის ოდენობის. განმეორებით გარემოს დანაგვიანებისთვის კი 6 ჯარიმა დაიწერა, 18 000 ლარის ოდენობით. 

1 კუბურ მეტრზე მეტი სამშენებლო ნარჩენით გარემოს დაბინძურებისთვის ფიზიკურ პირებზე 75 ჯარიმა დაიწერა, ჯამში 39 000 ლარის ოდენობით, განმეორებით დანაგვიანებისთვის კი 13 ჯარიმა გაიცა, 13 000 ლარის ოდენობით. 

დაჯარიმების ახალი სისტემა თბილისში 2018 წლის  3 აპრილიდან ამოქმედდა, თავდაპირველად ინსპექტრორები სიტყვიერი გაფრთხილებით შემოიფარგლებოდნენ, 20 აპრილიდან კი  მოქალაქეების დაჯარიმება დაიწყეს.