დაკავებულის და: შემოწმებისას აპარატმა ბუნებრივი აირის გაჟონვა არ დააფიქსირა

დიდ დიღომში, კორპუსში აფეთქების საქმეზე დაკავებული თორნიკე ტატიშვილის დამ თეონა ტატიშვილმა განაცხადა, რომ ტერიტორიის შემოწმებისას აპარატმა ბუნებრივი აირის გაჟონვა არ დააფიქსირა.

"ჩემი ძმა ამბობს, რომ ყველა წესის დაცვით შეამოწმეს ტერიტორია აპარატით და ყნოსვითაც. პირველი სართულიდან მეცხრე სართულის ჩათვლით, ფეხით ავიდნენ, რადგან ამბობს, რომ არ მუშაობდა ლიფტი იმ მომენტისთვის, ფეხით ავიდნენ, სათითაოდ შეამოწმეს ყველა სართული. არ დაფიქსირდა არც სუნი, არც აპარატმა დააფიქსირა გაჟონვა, ამიტომ წავიდნენ სხვა გამოძახებაზე, სადაც ერთ-ერთ გამოძახებაზე ამ აპარატმა დააფიქსირა, რომ იყო გაჟონვა, მოხდა კიდეც რეაგირება. ამ კონკრეტულ მისამართზე არ ყოფილა გაჟონვა. მან შეასრულა თავისი მოვალეობა ყველა წესის დაცვით. შემოწმების დროს მათთან ერთად ადგილობრივი მოსახლეობაც იმყოფებოდა, იმ მომენტში, როდესაც ისინი მივიდნენ, თვითონაც აღნიშნა მოსახლეობამ, რომ ნამდვილად ახლა აღარ არის სუნიო“, - განაცხადა თეონა ტატიშვილმა.

შსს-მ დიღომში აფეთქების ფაქტზე „ყაზტრანსგაზის“ ორი თანამშრომელი დააკავა. 

შინაგან საქმეთა სამინისტრო მომხდარ ფაქტთან დაკავშირებით გამოძიებას  სისხლის სამართლის კოდექსის 240-ე და 220-ე მუხლებით განაგრძობს. დანიშნულია სასამართლო-სამედიცინო , სახანძრო-ტექნიკური, აფეთქების მიზეზების გამომწვევი ტექნიკური, საქონელმცოდნეობითი და ტექნიკური ექსპერტიზები, რომელთა დასკვნის  საფუძველზე გამოიკვეთება დანაშაულთან შესაძლო შემხებლობაში მყოფი სხვა პირების სისხლისსამართლებრივი პასუხისმგებლობის საკითხი და გატარდება შესაბამისი ზომები.

დიდ დიღომში, ავთანდილის ქუჩის 8 ნომერში მდებარე საცხოვრებელ კორპუსში აფეთქება 16 იანვარს, საღამოს მოხდა. შედეგად 4 ადამიანი დაიღუპა, მათ შორის ერთი მცირეწლოვანი ბავშვია. 4 წლის ბიჭის გადარჩენა ექიმებმა ვერ შეძლეს. დაშავებულია 8 ადამიანი.