მანდატურის სამსახურის თანამშრომლები გაზრდილ ხელფასს იანვრის ბოლოს აიღებენ

მოტივაციის გაზრდის მიზნით მანდატური სამსახურის თანამშრომელთა ანაზღაურება 200 ლარით იზრდება. გაზრდილ ხელფასს ისინი უკვე იანვრის ბოლოს აიღებენ. ამის შესახებ ინფორმაციას განათლების სამინისტრო ავრცელებს. 

სამინისტროს ინფორმაციით, სკოლებში თვისებრივად ახალი ტიპის მანდატურის სამსახური ყალიბდება - უფრო მეტად ზრუნვასა და პრევენციაზე ორიენტირებული. უწყების ცნობით, ბოლო სამი თვის განმავლობაში აშშ-ის სკოლის მანდატურთა ეროვნულ ასოციაციასთან ინტენსიური მუშაობის შედეგად, შემუშავდა სწორედ თვისებრივად განსხვავებული მიდგომები.

"განსაკუთრებული ყურადღება მოსწავლეების ემოციურ მდგომარეობაზე ზრუნვას მიექცევა. ამისთვის  ძლიერდება მანდატურის სამსახურში არსებული ფსიქოლოგიური მომსახურების ცენტრები. შემუშავდა „ზოგადსაგანმანათლებლო დაწესებულებაში უსაფრთხოებისა და საზოგადოებრივი წესრიგის დაცვის წესი და პირობები“ - პირველი დოკუმენტი, რომელიც არეგულირებს მანდატურის სამსახურს, შინაგან საქმეთა სამინისტროს, სოციალური მომსახურების სააგენტოსა და საგანმანათლებლო დაწესებულებებს შორის კოორდინირებული თანამშრომლობის მექანიზმებს.

უსაფრთხოების წესის თანახმად, თითოეულ სკოლაში შეიქმნება მრჩეველთა საბჭო, რომელსაც ექნება 
საკონსულტაციო და მაკონტროლებელი ფუნქცია. 

ასევე შეიქმნა კრიზისული ინტერვენციის ჯგუფი, რომელიც გადაუდებელი შემთხვევის დროს საგანმანათლებლო დაწესებულებაში, ადგილზევე ეცნობა არსებულ სიტუაციას და ატარებს ყველა საჭირო ღონისძიებას. ასეთი მიდგომა მნიშვნელოვნად შეამცირებს ბავშვებსა და მოზარდებში გრძელვადიანი ფსიქოლოგიური ტრავმის ჩამოყალიბებას,"- წერია ინფორმაციაში.

ამავე ცნობით, ამ ეტაპზე მიმდინარეობს მუშაობა ელექტრონული პროგრამის შესაქმნელად, რომელიც მიზნად ისახავს მშობლის, სკოლის ადმინისტრაციის, მანდატურისა და განათლების სამინისტროს წარმომადგენლების მაღალ ჩართულობას სასკოლო პროცესში. ასევე დაგეგმილია ახალი ფსიქოლოგიური მომსახურების ცენტრების გახსნა სამცხე-ჯავახეთსა და სამეგრელოში. დღეს საქართველოს მასშტაბით 8 ფსიქოლოგიური ცენტრი მუშაობს.

"2021 წლის ბოლომდე პოლიციის აკადემიაში გადამზადდება 1300 მოქმედი მანდატური, რომლებსაც არ გაუვლია შსს-სთან თანამშრომლობის საფუძველზე შექმნილი ახალი სასწავლო მოდული. 2019 წლის სექტემბრამდე უსაფრთხოებაზე პასუხისმგებელი ყველა პირი სრულად აღიჭურვება მეტალო-დეტექტორებით,"- წერია განცხადებაში.

სამინისტროს ცნობითვე, ძალადობის შესახებ საზოგადოების ცნობიერების ამაღლებასა და ინფორმირების მიზნით სატესტო რეჟიმში ფუნქციონირებს ინტერნეტ-პორტალი www.befriend.mes.gov.ge, რომელიც წლის განმავლობაში საბოლოო სახით მოდიფიცირება.