კვლევა: რას ფიქრობს მოსახლეობა ქვეყნის განვითარებაზე და რა არის მთავარი ეროვნული საკითხი

"ეროვნულ-დემოკრატიულმა ინსტიტუტმა" (NDI) საზოგადოებრივი აზრის კვლევის შედეგები წარადგინა. კვლევის თანახმად, გამოკითხულთა 29% მიიჩნევს, რომ ქვეყანა სწორი მიმართულებით ვითარდება, 30% მიიჩნევს, რომ საერთოდ არ ვითარდება, 38% კი ფიქრობს, რომ საქართველო არასწორი მიმართულებით ვითარდება.

ამავე კვლევის მიხედვით, გამოკითხულთა უმრავლესობა სამ ყველაზე მნიშვნელოვან საკითხად გზებს (35%), გარემოს დაბინძურებასა (22%) და კომუნალურ გადასახადებს (22%) მიიჩნევს. ასევე პრობლემებს შორის ასახელებენ წყლით მომარაგებას - 18%, კანალიზაცია - 14%, საგზაო მოძრაობა - 13%, საზოგადოებრივი ტრანსპორტი - 12% და სხვა.

შეკითხვაზე “რომელი ეროვნული საკითხებია თქვენთვის და თქვენი ოჯახისთვის ყველაზე მნიშვნელოვანი?”, გამოკითხულთა უმრავლესობამ (51%-მა) სამუშაო ადგილები დაასახელა, 38%-მა სიღარიბე, 37%-მა ფასების ზრდა/ინფლაცია, 27%-მა ტერიტორიული მთლიანობა, 25%-მა ხელფასები, 15%-მა სამედიცინო მომსახურების ხელმისაწვდომობა. ამასთან, NDI-ის ცნობით ტოპ 6 ეროვნული საკითხი 2009 წლის შემდეგ არ შეცვლილა.

NDI-ის კვლევის მიხედვით, გამოკითხულთა 67% პოლიციის საქმიანობას დადებითად აფასებს; 21% - უარყოფითად, 12%-ი კი ამბობს, რომ არ იცის. 

ამასთანავე, კითხვაზე - როგორ შეიცვალა ბოლო 10 წელიწადში საქართველოში კრიმინალური მდგომარეობა - გამოკითხულთა 43% აცხადებს, რომ გაუარესდა, 32% ამბობს, რომ მდგომარეობა იგივე დარჩა, 18% კი ამბობს, რომ გაუმჯობესდა. ამ შეკითხვაზე პასუხი არ იცის გამოკითხულთა 7%-მა.

"ეროვნულ-დემოკრატიულმა ინსტიტუტმა" (NDI) კვლევის საველე სამუშაო, საქართველოს მასშტაბით, 6-20 დეკემბრის პერიოდში ჩაატარა და პირისპირ ინტერვიუს სახით, წარმომადგენლობითი შერჩევის საფუძველზე, 2 205 ადამიანი გამოკითხა. ცდომილების ზღვარი 2.1%-ია. 

NDI საქართველოს ოფისი 2010 წლიდან ახორციელებს საზოგადოებრივი აზრის კვლევის პროგრამას. ამ კომპონენტის მთავარი მიზანია საზოგადოებრივი აზრის კვლევების ჩატარებისა და გაზიარების გზით, მოქალაქეების პრიორიტეტების შესახებ ინფორმაციის ხელმისაწვდომობისა და ხარისხის გაზრდა.