ბახტაძე: რუსეთი განაგრძობს ჩვენი ტერიტორიების 20%-ის ოკუპაციას

საქართველოს პრემიერმინისტრმა მამუკა ბახტაძემ მიუნხენის უსაფრთხოების 55-ე კონფერენციის ფარგლებში აღმოსავლეთ ევროპაში უსაფრთხოებისადმი მიძღვნილ თემატურ დისკუსიაზე გამოსვლისას განაცხადა, რომ პრეზიდენტ ტრამპის ადმინისტრაციის პირობებში, საქართველოსა და აშშ-ს შორის ურთიერთობა ყველაზე მაღალ ნიშნულზეა.

"შეერთებული შტატები ჩვენი სტრატეგიული პარტნიორია და ძლიერი ორპარტიული მხარდაჭერა გვაქვს. მაგრამ, მინდა ამავდროულად ვახსენო, რომ ახლა პრეზიდენტ ტრამპის ადმინისტრაციის პირობებში ჩვენს ქვეყნებს შორის ურთიერთობა ყველაზე მაღალ ნიშნულზეა. ეს ფაქტი ძალიან ნათელია. გზავნილიც ძალიან ძლიერია. მიმაჩნია, რომ პოლიტიკა და სტრატეგია, რომელიც იკვეთება არსებული ადმინისტრაციის პირობებში იდეალურად ესადაგება რეგიონში ჩვენს წინაშე არსებულ გამოწვევებს.

აქვე მინდა, ვახსენო ძალიან მნიშვნელოვანი ფაქტი. ტერმინები „გაყინული კონფლიქტი“ და „ჰიბრიდული ომი“ პოპულარული ახლა ხდება მსოფლიოში, ჩვენთან კი ჰიბრიდული ომი 90-იანი წლების დასაწყისიდან გვაქვს. რაც შეეხება „გაყინულ კონფლიქტს“, რომელიც ჩემმა კოლეგებმა ახსენეს, უშუალო სამხედრო დაპირისპირების არქონა სულაც არ ნიშნავს იმას, რომ ქვეყანაში მშვიდობაა.

რუსეთი განაგრძობს აგრესიული ნაბიჯების გადადგმას საქართველოს წინააღმდეგ. ე.წ. ბორდერიზაციის პროცესის მომსწრენი გავხდით. თითქმის ყოველ კვირას ირღვევა ადამიანის ფუნდამენტური უფლებები: ჩვენს მოქალაქეებს იტაცებენ და სიკვდილამდე აწამებენ.

დავუბრუნდები ჩემს ძირითად სათქმელს. ყველაზე მნიშვნელოვანი, რაც ამ კონფერენციიდან გამყვება და მემახსოვრება ის არის, რომ შავი ზღვის რეგიონის უსაფრთხოება ნიშნავს მთელი ევროპის და ტრანსატლანტიკური სივრცის უსაფრთხოებას. ეს ძალიან მნიშვნელოვანი გზავნილია, რაც ყველა ჩვენგანმა მიიღო დღეს. მიმაჩნია, რომ ეს დიდი წინგადადგმული ნაბიჯია“, - განაცხადა საქართველოს პრემიერმინისტრმა.

მისივე თქმით, შავი ზღვის რეგიონი ხდება უმთავრესი პრიორიტეტი ნატოსა და ევროპისთვის.

"მტკივნეული გამოწვევა გვიდგას ქვეყანაში - რუსეთი განაგრძობს ჩვენი ტერიტორიების 20 პროცენტის ოკუპაციას, მაგრამ გამძლე ერი ვართ. ყოველთვის ვცდილობ, ხაზი გავუსვა, რომ ევროკავშირსა და ნატოში ჩვენი გაწევრიანების არჩევანი არ არის მხოლოდ პოლიტიკური, ეს ღირებულებებზე დაფუძნებული არჩევანია.

ბოლოდროინდელი სოციოლოგიური კვლევის თანახმად, მოსახლეობის 80% მხარს უჭერს ევროკავშირსა და ნატოში გაწევრიანების იდეას. ჩვენ ძალიან დიდი მხარდაჭერა გვაქვს ჩვენი მოსახლეობის მხრიდან. რატომ? იმიტომ, რომ ეს არ არის მხოლოდ პოლიტიკური არჩევანი. ეს ერის ცივილიზაციური არჩევანია და ამ გზავნილის მიტანას ვცდილობთ ჩვენს კარგ მეგობრებთან დასავლეთში. შავი ზღვის რეგიონი ხდება უმთავრესი პრიორიტეტი ნატოსა და ევროპისთვის. ეს ძალიან კარგი წინგადადგმული ნაბიჯია“, - განაცხადა მამუკა ბახტაძემ.

თემატურ დისკუსიაში, რომელსაც ევრაზიის ჯგუფის პრეზიდენტი იან ბრემერი მოდერატორობდა, საქართველოს პრემიერმინისტრთან ერთად უკრაინის პრეზიდენტი პეტრო პოროშენკო, ხორვატიის პრემიერმინისტრი ანდრეი პლენკოვიჩი და ეუთოს გენერალური მდივანი ტომას გრემინგერი მონაწილეობდნენ.