სალომე ზურაბიშვილს სურს, რომ დიასპორას საქართველოს პარლამენტში წარმომადგენელი ჰყავდეს

საქართველოს პრეზიდენტი სალომე ზურაბიშვილი საფრანგეთში ოფიციალური ვიზიტის ფარგლებში ქართველ ემიგრანტებს შეხვდა.

"არ მაინტერესებს ამ დარბაზში ვინ ამირჩია და ვინ არა, გინდათ თუ არ გინდათ დღეს თქვენი პრეზიდენტი ვარ. ყველას წინაშე ვარ პასუხისმგებელი არა მხოლოდ მათ წინაშე ვინც ამირჩია, არამედ ყველას წინაშე", - უთხრა მან ქართველ ემიგრანტებს.

მან ემიგრანტებს დახვედრისთვის მადლობა გადაუხადა. პრეზიდენტის თქმით, დღევანდელი დღე მისთვის მნიშვნელოვანია, რადგან ვერასდროს წარმოიდგენდა, რომ საფრანგეთში მისი ძმა როგორც ქართული სათვისტომოს პრეზიდენტი ისე მიიღებდა.

"ალბათ არასოდეს დამესიზმრებოდა, რომ ერთ დღეს მე აქ ვიდგებოდი და ჩემი ძმა მიმიღებდა როგორც სათვისტომოს პრეზიდენტი და მე როგორც საქართველოს პრეზიდენტი. ცხოვრება არის ძალიან უცნაური და ძალიან არაჩვეულებრივი. ჩემი მშობლებიც მახსენდება დღეს, რადგან დღეს ლევილში მათ საფლავზე ვიყავი და მათთვის ეს იქნებოდა ალბათ ყველა სურვილის ახდენა, ოცნებების, რომლისაც სჯეროდათ, სწამდათ. ეს არის უცხოეთში ყოფნა - როცა შენ გწამს... საქართველო იქნება ისეთი, როგორც ყველა ოცნებობდა", - განაცხადა საქართველოს პრეზიდენტმა. 

სალომე ზურაბიშვილის თქმით, ის მომხრეა, რომ დიასპორას საქართველოს პარლამენტში ერთ ან ორი წარმომადგენელი ჰყავდეს.

"მე მაგალითად ვარ მომხრე, ეს ვთქვი ქვეყნის შიგნით და ამაზე ჩემი საპარლამენტო მდივანიც მუშაობს, რომ მოვნახოთ ფორმა, რითიც შეიძლება დიასპორას ჰყავდეს ერთი ან ორი წარმომადგენელი საქართველოს პარლამენტში. ეს არის გავრცელებული პრაქტიკა სხვა ქვეყნებში, რომლებსაც ბევრი და რაოდენობრივად ძლიერი დიასპორები ჰყავთ. იტალია, საბერძნეთი, ამერიკა, საფრანგეთი, მათ ჰყავთ დიასპორის მიერ არჩეული წარმომადგენლები პარლამენტში. ეს არის ერთადერთი საშუალება იმისთვის, რომ ეს წარმომადგენლები, ეს პარლამენტარები იყვნენ თქვენი წარმომადგენლები. იმიტომ არავინ ქვეყნის შიგნით არ იცის და ვერ გაიგებს ისე კარგად, რა არის დიასპორის ინტერესები, თუ არა ადამიანი, რომელიც მოდის თქვენი რიგებიდან და არის მხოლოდ და მხოლოდ ამისთვის შერჩეული. იმედი მაქვს, ამ საკითხზეც მოვახერხებთ იმას, რომ დავარწმუნო პარლამენტიდან ყოფილი კოლეგები ამის აუცილებლობაში.თქვენც უნდა იაქტიუროთ", - განაცხადა საქართველოს პრეზიდენტმა.

მანამდე საქართველოს პრეზიდენტი საფრანგეთში მცხოვრებ ქართველ სტუდენტებს შეხვდა და ის ახალგაზრდების პრობლემებით დაინტერესდა.

მანამდე პრეზიდენტი ნოე ჟორდანიას საფლავი გვირგვინით შეამკო. გარდა ამისა, სალომე ზურაბიშვილი პარიზში, შვილებთან ერთად, წმინდა ნინოს სახელობის იმ ეკლესიაში დაესწრო წირვას, რომელიც მისი მამის, საფრანგეთში ქართული სათვისტომოს თავმჯდომარის, ლევან ზურაბიშვილის ინიციატივითა და ძალისხმევით მოეწყო.