სალომე ზურაბიშვილმა და ემანულ მაკრონმა ერთობლივი პრესკონფერენცია გამართეს

ელისეს სასახლეში სალომე ზურაბიშვილისა და ემანუელ მაკრონის შეხვედრა გაიმართა. შეხვედრის შემდეგ პრეზიდენტები ხელს მოაწერეს თანამშრომლობის დეკლარაციას „დიმიტრი ამილახვრის სახელობის ფრანგულ-ქართული დიალოგის“ დაფუძნების შესახებ, რომელიც სხვადასხვა სფეროში, მათ შორის თავდაცვით საკითხებში, თანამშრომლობას ითვალისწინებს.

ამის შემდეგ სალომე ზურაბიშვილმა და ემანუელ მაკრონმა ერთობლივი პრესკონფერენცია გამართეს.

როგორც მაკრონმა განაცხადა, საფრანგეთი სრულად უჭერს მხარს საქართველოს და მის ტერიტორიულ მთლიანობას.

„ჩვენ პოლიტიკურად ვიღებთ ვალდებულებას, რაც გვაქვს აფხაზეთისა და სამხრეთ ოსეთის ტერიტორიებთან მიმართებაში და ჩვენ შევეცდებით, რომ ერთობლივი ძალებით შევძლოთ ამ პრობლემების გადაჭრა“, – აღნიშნა ემანუელ მაკრონმა.

საფრანგეთის პირველი პირის პირის თქმით, საქართველოში წინასაარჩევნო კამპანია საკმაოდ რთული იყო, მაგრამ სალომე ზურაბიშვილმა მას თავი შესანიშნავად გაართვა.

„ვიცი, რომ საკმაოდ რთული იყო წინასაარჩევნო კამპანია, მაგრამ თქვენ შესანიშნავად გაართვით თავი, არ შეგიცვლიათ თქვენი პოზიციები, ბრძანდებით ერთგული თქვენი ქვეყნის და გამოძრავებთ ევროპული ღირებულებები, რაც თანმდევია თქვენს კარიერაში. გქონდათ არაჩვეულებრივი, წარმატებული დიპლომატიური კარიერა საფრანგეთში, რომელიც ბევრ მეტყველებს იმ მეგობრობაზე, იმ დამოკიდებულებაზე, რომელიც ჩვენს ქვეყანასთან მიმართებით გაქვთ და რომელიც არსებობს ორ ქვეყანას შორის.

ამასთან მაკრონის თქმით, მან ქართველი კოლეგისგან საქართველოში მიწვევა მიიღო.

„ქალბატონო პრეზიდენტო თქვენ მე დამპატიჟეთ საქართველოში და რა თქმა უნდა, ძალიან ბედნიერი ვიქნები ვუპასუხო ამ თქვენს მოწვევას და გეწვიოთ საქართველოში“, – განაცხადა ემანუელ მაკრონმა.

სალომე ზურაბიშვილმა თავის მხრივ საფრანგეთის მხარდაჭერის მნიშვნელობაზე ისაუბრა. 

„საფრანგეთი არ არის საქართველოსთვის ერთი რიგითი ევროპელი ქვეყანა. საფრანგეთი წარმოადგენს სხვა რამეს, სიმბოლოა თავისუფლების, სუვერენობის. თავისუფლების იმიტომ, რომ საფრანგეთის მთავრობამ მიიღო საქართველოს მთავრობა, როცა საქართველო რუსეთმა დაიპყრო. შემდეგ, როცა სამწუხაროდ, საქართველოს ემიგრაცია ბევრი წლის განმავლობაში საფრანგეთში დარჩა, საფრანგეთი ყოველთვის იყო ქვეყანა, რომელიც ბოლომდე იცავდა ქართულ ემიგრაციას და აძლევდა ყველა საშუალებას, რათა თავი ეგრძნოთ, როგორც საკუთარ ქვეყანაში. მე ვარ ამის მაგალითი, რომ მივიღე ყველა საშუალება, თუნდაც ის, რომ დიპლომატიური კარიერა ბოლომდე მიმეყვანა ელჩის სტატუსამდე ისე, რომ არავის არასოდეს ჰქონია პრეტენზია, რომ ვიყავი ფრანგიც და ქართველიც ბოლომდე"- განაცხადა სალომე ზურაბიშვილმა.