კობახიძე: კონსტიტუციაში ვერ ჩაიწერება ის, რაც სასამართლოს დამოუკიდებლობას ეწინააღმდეგება

პარლამენტის თავმჯდომარე ირაკლი კობახიძე პარლამენტის ბიუროს სხდომაზე მოსამართლეების უვადოდ დანიშვნის შესახებ მმართველი პარტიის გადაწყვეტილებაზე ეკა ბესელიასა და მისი თანამოაზრეების განცხადებებს გამოეხმაურა.

ირაკლი კობახიძის განცხადებით, 9 დეპუტატის კანონპროექტი კონსტიტუციის გარდამავალ დებულებებს ეწინააღმდეგება. მისი თქმით, კონსტიტუციაში სასამართლოს დამოუკიდებლობის პრინციპი უნდა აისახოს და სწორედ ამ "სულისკვეთებით დაიწერა კონსტიტუცია ვენეციის კომისიის ჩართულობით".

"ბრძოლა დაგვჭირდა იმისათვის, რომ პარლამენტის ჩართულობა ყოფილიყო მაგალითად უზენაესი სასამართლოს მოსამართლეების არჩევის საკითხში და იქაც ვენეციის კომისიამ კრიტიკული შენიშვნები დაგვიწერა. ასევე გარდამავალ დებულებებში ჩავწერეთ სამწლიანი ე.წ. გამოსაცდელი ვადა, ამაზეც მთელი ბრძოლები და ახსნა-განმარტება დაგვჭირდა; სადაც კი ვეხებოდით დროებითი თუ არა დროებით რეგულაციებით ვეხებოდით სასამართლოს დამოუკიდებლობის პრინციპს, ვენეციის კომისიას ყველაზე კრიტიკული შენიშვნები ჰქონდა, თუმცა ნაწილი არ გავიზიარეთ და ჩავწერეთ ის, რაც ჩავწერეთ. ზოგადად, კონსტიტუცია არის აგებული სასამართლოს დამოუკიდებლობის პრინციპზე, თუ ვიღაც ფიქრობს, რომ დღევანდელი სასამართლო დამოუკიდებლობას არ იმსახურებს, ამაზე შეიძლება მსჯელობა, მაგრამ კონსტიტუციაში ვერ ჩაიწერება ისეთი დებულებები, რომელიც არ ეფუძნება სასამართლოს დამოუკიდებლობის პრინციპს",-  განაცხადა ირაკლი კობახიძემ.

„ქართული ოცნების“ ცენტრალურ ოფისში პოლიტსაბჭოს სხდომის დასრულების შემდეგ მმართველმა გუნდმა მოსამართლეებზე ეკა ბესელიას და კიდევ 8 დეპუტატის ინიციატივაზე განაცხადა, რომ უმრავლესობა ინიციატივას მხარს არ დაუჭერს. განცხადების თანახმად, მმართველი პარტია მოსამართლეთა დანიშვნის წესებისა და კრიტერიუმების შემუშავების პროცესში ვენეციის კომისიას სთავაზობს ჩართვას. 

"ქართული ოცნების" განცხადებას უპასუხეს ინიციატივის ავტორებმა ეკა ბესელიამ და ლევან გოგიჩაიშვილმა. ბესელიას თქმით, თუ მოსამართლეთა უვადოდ დანიშვნის შეჩერების პრინციპს ეთანხმება უმრავლესობა, კანონპროექტის ფორმულირების კონსტიტუციასთან შესაბამისობა საბაბია. 

7 თებერვალს პარლამენტის 9 დეპუტატმა პარლამენტში კანონპროექტი დაარეგისტრირა, რომლის მიხედვითაც „საერთო სასამართლოების შესახებ“ კანონში ცვლილებებს ითხოვენ. მათ სურთ, რომ რაიონულ და სააპელაციო სასამართლოებში მოსამართლეთა უვადოდ გამწესება 2024 წლის 31 დეკემბრამდე შეჩერდეს. 

11 თებერვალს ეკა ბესელიამ განაცხადა, რომ პარლამენტს კიდევ ერთ ინიციატივას წარუდგენს, რომელიც უვადოდ უკვე დანიშნულ მოსამართლეებს შეეხება.