ზვიად ძიძიგური: ახალი ადამიანების მოსვლა და ძველების წასვლა კონფლიქტში არ უნდა იყოს ერთმანეთთან

პარლამენტის ვიცესპიკერის ზვიად ძიძიგურის განცხადებით, 2012 წელს "ქართული ოცნება" ორი არჩევანის წინაშე დადგა: "ან უნდა გაგვეყარა ყველა მოსამართლე და მოგვეყვანა ჩვენს მიმართ ლოიალურად განწყობილი ადამიანები, ან დაგვეტოვებინა ის კონტინგენტი რაც იყო და გაეგრძელებინა ინსტიტუციას მუშაობა". ამის შესახებ პარლამენტის ვიცესპიკერმა ზვიად ძიძიგურმა გადაცემა "იმედი Live"-ის ეთერში განაცხადა.

ზვიად ძიძიგურის თქმით, როდესაც სასამართლო რეფორმა დაიწყო მმართველმა პარტიამ, კოალიციაში პირველი კამათი გაჩნდა მოსამართლეების უვადო დანიშვნასთან დაკავშირებით.

"ჩვენთვის უვადოდ დანიშვნის საკითხის გადავადება ან მორატორიუმის გამოცხადება არ ექვემდებარებოდა რაიმე ტიპის გადასინჯვას, ამიტომ პარლამენტში ჩვენი პოზიცია ყველამ იცოდა", - განმარტა ზვიად ძიძიგურმა.

ამ საკითხზე ეკა ბესელიასა და მისი თანამოაზრეების მკვეთრ პოზიციასთან დაკავშირებით, ზვიად ძიძიგური ამბობს, რომ მათსა და უმრავლესობას შორის პოზიციური სხვაობა არსებობს და ამ სხვაობამ გამოიწვია ის, რომ 9 დეპუტატის ინიციატივა პარლამენტში არ გავიდა.

ზვიად ძიძიგურის თქმით, უმრავლესობის ან ხელისუფლების პრობლემა დღეს ის არ არის, რომ სასამართლოსთან დაკავშირებით პრობლემა აქვთ. "სასამართლო გაცილებით უკეთესი და დამოუკიდებელია ვიდრე იყო. ჩვენი პრობლემა სხვა რამეა: მოსახლეობის პრობლემები, რომელზეც სიგნალი მივიღეთ არჩევნების დროს და ამას ადეკვატური რეაგირება სჭირდება ხელისუფლების მხრიდან", - აცხადებს ზვიად ძიძიგური. 

რაც შეეხება იმას, არიან თუ არა ის ადამიანები, რომლებმაც "ქართული ოცნება" დატოვეს, ე.წ. ძველი გვარდიის წევრები, ზვიად ძიძიგური პასუხობს:

"რა თქმა უნდა, ეკა ბესელია აღიქმება როგორც ძველი გვარდიის წარმომადგენლად, ისევე როგორც ლევან გოგიჩაიშვილი და გედევან ფოფხაძე. არ ვფიქრობ, რომ უმრავლესობიდან მათი გასვლა და მათთან თანამშრომლობა ან იმათთან, ვინც 2011-12 წლებში ჩვენთან იყო და ახლა აღარ არის, ამოწურულია", - განაცხადა ზვიად ძიძიგურმა.

ძიძიგურის თქმით, ის არ ეთანხმება იმ მოსაზრებას, რომ უნდა დარჩნენ ძველი სახეები და ახალი არ უნდა მივიდეს.

"არ ვეთანხმები მოსაზრებას, რომ ახალი ადამიანები გუნდის განვითარებას ხელს უშლიან. ახალი ადამიანების მოსვლა და ძველების წასვლა კონფლიქტში არ უნდა იყოს ერთმანეთთან. ეს არის მთავარი", - განაცხადა ზვიად ძიძიგურმა.

ძიძიგურის განცხადებით, ეკა ბესელიამ პოლიტიკური გადაწყვეტილება მიიღო. ვიცესპიკერი ამბობს, რომ მას ეკა ბესელიას ოპოზიციონერობა ვერ წარმოუდგენია. 

"ის პოლიტიკაში რჩება, პარლამენტში რჩება და მგონია, რომ ერთად თანამშრომლობის რესურსები არსებობს. არის თემები, სადაც შეიძლება ერთმანეთთან დაპირისპირებულები ვიყოთ, ეს პოლიტიკაა", - თქვა ზვიად ძიძიგურმა.

23 თებერვალს გედევან ფოფხაძემ, ეკა ბესელიამ და ლევან გოგიჩაიშვილმა პარტია „ქართული ოცნება“ ოფიციალურად დატოვეს. 22 თებერვალს, მმართველმა პარტიამ "ქართულმა ოცნებამ" პარლამენტში საკონსტიტუციო უმრავლესობა დაკარგა. „ოცნებაში“ 112 დეპუტატი დარჩა, რაც კონსტიტუციის ¾-ის უმრავლესობით მიღებისათვის არასაკმარისი რაოდენობაა, რადგან ასეთი კვორუმით კონსტიტუციაში ცვლილებების განხორციელებას სულ მცირე 113 დეპუტატის ხმა სჭირდება.