პარლამენტში სალომე ზურაბიშვილს უსმენენ

სალომე ზურაბიშვილი ქვეყნის თავისი პირველი ყოველწლიური ანგარიშით პარლამენტში გამოდის. მოსმენა ცოტა ხნის წინ დაიწყო.

საქართველოს პრეზიდენტმა განაცხადა, რომ საქართველო არ ეგუება და არც შეეგუება ტერიტორიების ოკუპაციას, გატაცებებს და მცოცავ ხაზებს, რომელიც ძალადობისა და შანტაჟის პოლიტიკის ნაწილია. 

,,არც იმას ვეგუებით, რომ მოლაპარაკებების ფორმატები დღეს მხოლოდ ტექნიკურ დონეზე მიმდინარეობს. ჩვენს პარტნიორებთან ვისაუბრე მაღალი პოლიტიკური ფორმატის განახლების აუცილებლობაზე. მათ უნდა გააგებინონ რუსეთს, რომ 21-ე საუკუნეში ნულოვანი ჯამის თამაში არავის ინტერესში აღარ არის და აგრესიული პოლიტიკა წარსულში ჩარჩენის გზაა“, - აღნიშნა სალომე ზურაბიშვილმა.

პარლამენტში დეპუტატებთან ერთად იმყოფებიან პრემიერმინისტრი და მინისტრთა კაბინეტის წევრები, სასამართლო ხელისუფლების წარმომადგენლები, დედაქალაქის მერი, სახელმწიფო უწყებების ხელმძღვანელი პირები და დიპლომატიური კორპუსის წარმომადგენლები და ასევე უმაღლესი სასულიერო პირები.

ბოიკოტის გამო პლენარულ სხდომას „ნაციონალური მოძრაობის“ და „ევროპული საქართველოს“ დეპუტატები არ ესწრებიან.