სესიაშვილი ხურვალეთზე: პანიკის საფუძველი არ არის

საქართველოს პარლამენტის თავდაცვისა და უშიშროების კომიტეტის თავმჯდომარემ ირაკლი სესიაშვილმა განაცხადა, რომ გარკვეული პირების მხრიდან პანიკის დათესვა შემაშფოთებელია, რადგან უსაფრთხოებაზე უარყოფითად აისახება.

"გავრცელდა სახელმწიფო უსაფრთხოების სამსახურის განცხადება, რომელიც არ ადასტურებს, რომ ოკუპანტები გადმოვიდნენ საქართველოს მიერ კონტროლირებად ტერიტორიაზე. ამას არ ადასტურებს ევროკავშირის სადამკვირვებლო მისიაც, შესაბამისად, რა თქმა უნდა პანიკის საფუძველი არ უნდა იყოს. მეც ვუერთდები სახელმწიფო უსაფრთხოების სამსახურის მოწოდებას, რომ პანიკის ხელოვნურად დათესვა აბსოლუტურად გაუმართლებელია, რამდენადაც ეს ჩვენი ქვეყნის სტაბილურობაზე და მოსახლეობის სიმშვიდეზე უარყოფითად იმოქმედებს. თუკი რამე ქმედება არის საჭირო, პირველ რიგში სახელმწიფო უწყებები განახორციელებენ. ამიტომ შემაშფოთებელია გარკვეული პირების მხრიდან პანიკის დათესვა, რამდენადაც ეს უარყოფითად აისახება უსაფრთხოებაზე“, – განაცხადა სესიაშვილმა.

საქართველოს პარლამენტის ევროინტეგრაციის კომიტეტის თავმჯდომარის, თამარ ხულორდავას განცხადებით, საოკუპაციო ხაზთან საგანგაშო არაფერი ხდება და აღნიშნულ საკითხთან დაკავშირებით ყოველგვარი სპეკულაცია აბსოლუტურად დაუშვებელია. მისი თქმით, ადგილზე სამართალდამცველები იმყოფებიან და სიტუაცია სრულიად კონტროლირებადია.

ჩვენს ხელთ არსებული ინფორმაციით, რუსმა ჯარისკაცებმა უკვე დატოვეს ის ადგილები, სადაც დღეს იყვნენ განლაგებულები, - ამის შესახებ სოფელ ხურვალეთთან საოკუპაციო რეჟიმის წარმომადგენლების გამოჩენის საკითხზე კომენტირებისას სახელმწიფო მინისტრმა შერიგებისა და სამოქალაქო თანასწორობის საკითხებში, ქეთევან ციხელაშვილმა განაცხადა.

ქეთევან ციხელაშვილმა ყველას მოუწოდა, ამ საკითხთან დაკავშირებით ინფორმაციის გავრცელებას მაქსიმალურად სიფრთხილით მოეკიდონ.

„მინდა მოგაწოდოთ ბოლო ინფორმაცია ხურვალეთში არსებულ ვითარებასთან დაკავშირებით. ამ ეტაპისთვის ჩვენს ხელთ არსებული ინფორმაციით, რუსმა ჯარისკაცებმა უკვე დატოვეს ის ადგილები სადაც დღეს იყვნენ განლაგებულები. ასევე, ევროკავშირის მონიტორინგის მისიამ და საქართველოს უსაფრთხოების სამსახურმა გაავრცელეს განცხადებები, რომ არ დაფიქსირებულა ინციდენტი მათი გადმოსვლის, წვდომის ან რაიმე ტიპის დამატებითი ბარიკადების მშენებლობის საქართველოს ცენტრალური ხელისუფლების მიერ კონტროლირებად ტერიტორიაზე.

მე მინდა ვთხოვო ყველას, მათ შორის მედიას, ვიყოთ მაქსიმალური სიფრთხილითა და პასუხისმგებლობით აღჭურვილი, რადგან ჩვენ ვცხოვრობთ ამ მოცემულობაში, როდესაც ტერიტორიები არის ოკუპირებული. საუბედუროდ, დგანან რუსი ჯარისკაცები და თქვენ იცით, რომ ამ პირობებში ჩვენი ამოცანა არის თავიდან ავირიდოთ ნებისმიერი პროვოკაცია“, - განაცხადა ქეთევან ციხელაშვილმა.

ადგილობრივები ამბობენ, რომ ხურვალეთში საქართველოს მიერ კონტროლირებად ტერიტორიაზე შეიარაღებული  რუსი სამხედროები იმყოფებოდნენ. მათ ოკუპანტები რამდენიმე საათის წინ სოფელ ხურვალეთის განაპირას, იმ ტერიტორიაზე  დაინახეს, სადაც ცოტა ხნის წინ  სამეთვალყურეო კოშკურა დამონტაჟდა. 

25 მარტს საქართველოში ნატოს გენერალური მდივანი იენს სტოლტენბერგი ჩამოდის. მანამდე რუსეთის ოფიციალური პირებისგან მუქარის შემცველი განცხადებები გავრცელდა. კერძოდ, რუსეთის საგარეო საქმეთა მინისტრის მოადგილემ პრაღაში კარასინი-აბაშიძის შეხვედრის დაწყებამდე განაცხადა, რომ საქართველოს უსიამოვნო მოულოდნელობები ელის. საქართველო-ნატოს თანამშრომლობას მუქარა მოჰყვა რუსეთის თავდაცვის მინისტრ, სერგეი შოიგუსგანაც, რომელმაც საპასუხო ნაბიჯების გადადგმის პირობა დადო.