ქართველ მუსლიმთა კავშირი: ახალწვეულებზე სესიაშვილის ინიციატივა დისკრიმინაციულია

"ქართველ მუსლიმთა კავშირის" თავმჯდომარე ტარიელ ნაკაიძე პარლამენტის თავდაცვისა და უშიშროების კომიტეტის თავმჯდომარის, ირაკლი სესიაშვილის ინიციატივას სამხედრო სავალდებულო სამსახურის შესახებ დისკრიმინაციულს უწოდებს. ამის შესახებ მან პრესკონფერენციაზე თქვა. 

ტარიელ ნაკაიძე ამბობს, რომ რელიგიური ორგანიზაციები მათ ხელთ არსებულ ყველა სამართლებრივ ბერკეტს გამოიყენებენ, რათა მართლმადიდებლების გარდა, სხვა რელიგიის წარმომადგენლებსაც ჰქონდეთ თანაბარი უფლებები. მისივე თქმით, ამ თემაზე რელიგიათა საბჭოში დაგეგმილია კონსულტაციები, რომელშიც სახალხო დამცველი, იურისტები და 32 რელიგიური ორგანიზაცია იქნება ჩართული. შეხვედრის შემდეგ კი გაკეთდება განცხადება საერთო პოზიციასთან დაკავშირებით.

სესიაშვილის ამ კანონპროექტზე პრესკონფერენციაზე განცხადება გააკეთა პარტია "გირჩის" თავმჯდომარემ იაგო ხვიჩიამაც და მიმდინარე პროცესს ამორალური უწოდა. მისი თქმით, ჯარის მოხდა მხოლოდ იმ ადამიანებს უწევთ, რომელთაც არ ჰყავთ გავლენიანი ახლობლები. მაღალი თანამდებობის პირთა შვილები კი ამ ვალდებულებას მარტივად ირიდებენ თავიდან.

"გირჩში" ამბობენ, რომ ის კანონი, რომლის ცვლილებასაც პარლამენტი გეგმავს, კონკორდატით გათვალისწინებულ წესს აბათილებს, რომლის მიხედვითაც, სხვადასხვა რელიგიის წევრები თანაბარი პირობებით სარგებლობენ. კანონის ცვლილების შემდეგ კი მართლმადიდებლების გარდა, ვერც ერთი კონფესია ვერ აირიდებს სამხედრო სამსახურს, რაც იაგო ხვიჩიას შეფასებით დისკრიმინაცია და უფლებების დარღვევაა.

საქართველოს პარლამენტის თავდაცვისა და უშიშროების კომიტეტის თავმჯდომარის ირაკლი სესიაშვილის მიერ მომზადებული კანონპროექტის "სამხედრო ვალდებულებისა და სამხედრო სამსახურის შესახებ“ ბიუროს სხდომაზე დღეს განიხილება.

კანონპროექტის მიხედვით, უნდა გაუქმდეს ის ნორმა, რომლის მიხედვითაც, პირები, რომლებიც მღვდელმსახურები არიან ან სასულიერო სასწავლებელში სწავლობენ, სამხედრო სავალდებულო სამსახურის გადავადების უფლებით სარგებლობენ.

ამ ცვლილებებით კონკრეტდება, რომ პირებს, რომლებიც უარს განაცხადებენ, სამხედრო სავალდებულო სამსახურის მოხდაზე სინდისის, აღმსარებლობისა და რწმენის თავისუფლების მოტივით, ეკისრებათ ვალდებულება, ალტერნატიული შრომითი სამსახური გაიარონ.