ლინკევიჩუსი: არაღიარების პოლიტიკა და რუსეთზე ზეწოლა უნდა განვაგრძოთ

ლიეტუვის საგარეო საქმეთა მინისტრმა ლინას ლინკევიჩუსმა საქართველოს ოკუპირებულ ტერიტორიებთან დაკავშირებით „ქრონიკის“ შეკითხვას უპასუხა და განმარტა, რა ზომებს უნდა მიმართოს ევროკავშირმა ამ პრობლემების მოსაგვარებლად. ამის შესახებ ლინკევიჩუსმა ევროკავშირის საგარეო საქმეთა მინისტერიალის დაწყებამდე განაცხადა.

„საქართველოს ოკუპირებულ ტერიტორიებზე მძიმე მდგომარეობაა. ირღვევა ადამიანის უფლებები. ბოლო ტრაგიკული შემთხვევა საქართველოს მოქალაქესთან დაკავშირებით შემაშფოთებელია. მისი დაღუპვის საქმის გამოძიება უნდა მოხდეს. გამოძიება უნდა წარიმართოს დროულად, გამჭვირვალედ და სამართლიანად. ეს იყო და არის კიდევ ერთი მტკიცებულება იმის, რომ რეგიონში სიტუაციის გაუმჯობესებაზე საუბარი არ არის. ვითარება მძიმეა. მძიმეა მოქალაქეების უსაფრთხოებასთან დაკავშირებული საკითხები და ადამიანის უფლებების კუთხით ოკუპირებულ ტერიტორიებზე არსებული ვითარება. სამწუხაროდ, კარგი ამბავი არ არის. გვაქვს საქართველოში ასეთი ვითარება და პარალელურ რეჟიმში უკრაინაში ყირიმის ანექსია. გადის 5 წელი.

ჩვენ გვაქვს დაწესებული სანქციები, რომლებსაც დამატებითი ზომები დაემატა. მოხარული ვარ, რომ ეს მოხდა კანადასთან და ამერიკის შეერთებულ შტატებთან ერთად. არაღიარების პოლიტიკა უნდა შევავსოთ კონკრეტული ზომებით და გავაგრძელოთ ზეწოლა რუსეთზე. რუსეთზე უნდა მოხდეს პოლიტიკური, დიპლომატიური, ეკონომიკური, ფინანსური ზეწოლა. ეს არის ჩვენი ამოცანა და მიზანი. არ უნდა მოვახდინოთ იმის ლეგიტიმაცია, რაც არის არალეგიტიმური და რაც არის უხეში დარღვევა სამართლის ნორმებისა და პრინციპების“, - განაცხადა ლინკვიჩუსმმა.

ბელგიის საგარეო საქმეთა მინისტრის დიდიე რეინდერსის თქმით კი, ამ მიმართულებით აქტიურ როლს ასრულებს ევროკავშირი და აქტიური უნდა იყოს ევროპული საბჭო.

"მნიშვნელოვანია, გამოვიყენოთ ყველა შესაძლებლობა სიტუაციის გასაუმჯობესებლად. ჩვენ მუდმივად კონტაქტზე ვართ ჩვენს ქართველ პარტნიორებთან. მნიშვნელოვანი შეხვედრა იყო პრემიერმინისტრთან და ვესაუბრეთ ყველა თემაზე. აქტიურ როლს ასრულებს ევროკავშირი, აქტიური უნდა იყოს ევროპული საბჭო. ვფიქრობ, შესაძლებელია ევროპული საბჭოსთვის, რომ ინსტრუმენტები გამოიყენოს საქართველოს ორ რეგიონში, აფხაზეთსა და სამხრეთ ოსეთში. ევროკავშირი მხარს უჭერს საქართველოს ტერიტორიულ მთლიანობასა და სუვერენიტეტს. ჩვენ ვაგრძელებთ საქართველოს გვერდით დგომას და არაღიარების პოლიტიკას", - თქვა ევროპელმა დიპლომატმა.

12 მარტს სახელმწიფო უსაფრთხოების სამსახურისთვის ცხელი ხაზით მიღებული ინფორმაციით, ცნობილი გახდა, რომ ოკუპირებულ გალის რაიონში ადგილობრივმა მკვიდრმა, საქართველოს მოქალაქემ, ირაკლი კვარაცხელიამ თავი მოიკლა. კვარაცხელია მანამდე დეფაქტო ხელისუფლებამ ე.წ. საზღვრის კვეთისთვის დააკავა.