იტალიიდან თურქეთის გავლით დაბრუნებული შუახნის კაცი ბათუმში კარანტინში მოათავსეს

ბათუმში კორონავირუსის შესაძლო გავრცელების აღკვეთის მიზნით ერთი ადამიანი კარანტინში მოათავსეს. შუახნის კაცი სარფიდან ბათუმის ინფექციურ საავადმყოფოში გადაიყვანეს. მას საბაჟოზე შემოწმებისას 37,3 ტემპერატურა ჰქონდა.

„შუახნის კაცი იტალიიდან მოდიოდა და სატვირთო ავტომობილით საქართველოში სარფის გავლით შემოვიდა. ამ დროისთვის პაციენტის მდგომარეობა სტაბილურია, მას სიცხე აღარ აქვს. აღებულია ანალიზები და პასუხი ხვალ იქნება ცნობილი“, - განაცხადა ჯანდაცვის მინისტრის მოადგილემ, ნინო ნიჟარაძემ.

უწყებაში ამბობენ, რომ ვირუსის გავრცელების პრევენციისთვის საკარანტინო ადგილების მოძიება მიმდინარეობს.

საქართველოში კორონავირუსის პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა. კორონავირუსის მეორე შემთხვევა საქართველოში 2020 წლის 28 თებერვალს, მესამე კი 29 თებერვალს დადასტურდა.

ჩინეთში გარდაცვლილთა რაოდენობამ 2 870-ს მიაღწია, ინფიცირებულთა რიცხვი კი 79 824-ს შეადგენს. მსოფლიო მასშტაბით, ვირუსი უკვე 64 ქვეყანაშია გავრცელებული, სადაც გარდაცვლილთა რაოდენობამ 109 შეადგინა. 86 993 ინფიცირებულიდან გამოჯანმრთელებული კი 42 334-ია.

26 თებერვალს ჯანმომ განაცხადა, რომ კორონავირუსის პანდემიად გამოცხადების საფუძველი ჯერ არ არსებობს.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.