ბათუმის პორტიდან ინფექციურ საავადმყოფოში საეჭვო სიმპტომებით ერთი ადამიანი გადაიყვანეს

ბათუმის ინფექციურ საავადმყოფოში ერთი პირი პორტიდან გადაიყვანეს. მას საეჭვო სიმპტომები და იტალიაში მოგზაურობის ისტორია აქვს, რის გამოც ის ბოქსირებულ განყოფილებაში მოათავსეს.

აჭარის ჯანდაცვის მინისტრის მოადგილის, ნინო ნიჟარაძის თქმით, ინფექციურ საავადმყოფოში იმყოფება კიდევ 3 პირი. ისინი ჯანმრთელები არიან და დღეს თბილისში, სხვა საკარანტინო ზონაში გადაიყვანენ.

„ბათუმში ერთი შესაძლო შემთხვევა გვყავს, რომელიც ბათუმის პორტიდან არის ინფექციურში გადაყვანილი. ეს ადამიანი 25 თებერვალს გამოემზავრა იტალიიდან უკრაინის გავლით. ბათუმში შემოვიდა გუშინ. იდენტიფიცირებულია როგორც შესაძლო პაციენტი, ჰქონდა ცხელება. ველოდებით მისი ლაბორატორიული კვლევის პასუხს. ინფეციურში კიდევ სამი ჯანმრთელი პირი იმყოფება, ისინი კარანტინის რეჟინში არიან. დღეს მათ თბილისში გადავიყვანთ. გონიოს სასტუმროში მოთავსებულია 30 პირი“, - განაცხადა ნიჟარაძემ.

საქართველოში კორონავირუსით ინფიცირების 15 შემთხვევაა დადასტურებული, კარანტინის რეჟიმშია 141 ადამიანი, ხოლო სტაციონარში მეთვალყურეობის ქვეშ – 51. პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

4 მარტს კი ცნობილი გახდა, რომ ვირუსით იტალიაში მცხოვრები საქართველოს მოქალაქე დაინფიცირდა. ბოლო მონაცემებით, COVID-19-ს მსოფლიოს მასშტაბით 3491 ადამიანი ემსხვერპლა, 57389 კი გამოჯანრთელდა.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.