ნათია თურნავა წყალტუბოს რეაბილიტაციაზე: ნუ ნერვიულობს ოპოზიცია, ჩვენ ყველა დანაპირებს ვასრულებთ

ნუ ნერვიულობს ოპოზიცია, ჩვენ ყველა დანაპირებს ვასრულებთ. წყალტუბოს აღორძინება დაიწყება გეგმაზომიერად, - ამის შესახებ ეკონომიკის და მდგრადი განვითარების მინისტრმა, ნათია თურნავამ ქუთაისში ვიზიტისას ჟურნალისტებს განუცხადა. მისი თქმით, პანდემიამ ბევრი პროცესი შეანელა, თუმცა საბოლოო ჯამში წყალტუბოს პროექტზე ეს გავლენას არ იქონიებს.

„რა თქმა უნდა, კორონავირუსმა შეანელა ბევრი პროცესი, მაგრამ ეს საბოლოო ჯამში არანაირად არ დაეტყობა წყალტუბოს პროექტს და ამის დასტურია თუნდაც აბასთუმნის პროექტი, რომელიც ბატონ ბიძინა ივანიშვილის და „ქართუ“ ფონდის ქველმოქმედების საფუძველზე და კერძო ბიზნესის ჩართულობით ხორციელდება. ნახეთ როგორ ხორციელდება ეს აბასთუმანში. ასეთივე აღმავლობა ძალიან სწრაფად დაიწყება წყალტუბოში და ზოგიერთი ოპოზიციონერი, ვისაც კორონავირუსის ეპიდემიის შემდეგ გაახსენდა თურმე რა ხდება ახლა წყალტუბოში, ჯერ კიდევ სტუდენტები იყვნენ როდესაც ბიძინა ივანიშვილი თავის პირველ ქველმოქმედებას ახორციელებდა წყალტუბოში. ასე რომ არანაირად არ გაგვიჭირდება ამ პროექტის შესრულება“, - განაცხადა მინისტრმა.

2019 წლის 29 ოქტომბერს ბიძინა ივანიშვილმა განაცხადა, რომ წყალტუბოს განვითარების ერთიანი გეგმის ფარგლებში უკლებლივ ყველა, 22 სასტუმროს და 9 აბანოს გამოსყიდვა გადაწყვიტა. პარტია „ქართული ოცნების“ თავმჯდომარის თქმით, პროექტი რეგიონში 15 000 -20 000 ადამიანს დაასაქმებს.