კახეთის გუბერნატორი 15 ივლისს სტიქიისგან დაზარალებულ სოფელ კონდოლში მიმდინარე სარეაბილიტაციო სამუშაოებს გაეცნო

კახეთის გუბერნატორი ირაკლი ქადაგიშვილი 15 ივლისს სტიქიისგან დაზარალებულ თელავის მუნიციპალიტეტის, სოფელ კონდოლში ჩავიდა, სადაც მიმდინარე სარეაბილიტაციო სამუშაოებს ადგილზე გაეცნო. უკვე რამდენიმე კვირაა კონდოლში ათობით დაზიანებული საცხოვრებელი სახლის გადახურვის პროცესი მიმდინარეობს.

კახეთში მომხდარი სტიქიის შედეგად თელავისა და ყვარლის მუნიციპალიტეტებში ინფრასტრუქტურა დაზიანდა. მთავრობის გადაწყვეტილებით, მყისიერად გამოიყო ფინანსური რესურსები საცხოვრებელი სახლების ინფრასტრუქტურის მოსაწესრიგებლად.

„სოფელ კონდოლში სტიქიის შედეგად, დაახლოებით 150 საცხოვრებელი სახლი დაზიანდა. აღნიშნულ სოფელში არსებობდა ძველი გადახურვები ე.წ. „შიფერით“ და ამიტომ მიმდინარეობს თითქმის 90% დაზიანებული საცხოვრებელი სახლისთვის სახურავების სრული გამოცვლა. ძველი სახურავების რესურსი მთლიანად იყო ამოწურული, ეკოლოგიური თვალსაზრისით არ არის რეკომენდებული ე.წ. „შიფერის“ გამოყენება. აქ გამოყენებული სამშენებლო მასალა, თუნუქი არის ძალიან ხარისხიანი.

ვფიქრობ, რომ ეს მასშტაბური სამუშაოები, როდესაც სოფელ კონდოლში დასრულდება, აქ მცხოვრები მოსახლეობა მრავალი ათეული წლის განმავლობაში უზრუნველყოფილი იქნება მყარად დაფარებული ჭერით. ანალოგიური პროცესი მიმდინარეობს და გაგრძელდება, ყველა იმ სოფელში, რომელიც სტიქიის შედეგად იქნა დაზიანებული, როგორც თელავის, ასევე ყვარლის მუნიციპალიტეტში“, - განაცხადა ირაკლი ქადაგიშვილმა.

ბოლო მონაცემებით, ორ მუნიციპალიტეტში ძლიერმა ქარმა და სეტყვამ 200-ზე მეტი სახლის სახურავი დააზიანა. გარდა ამისა, სტიქიამ გაანადგურა ერთწლიანი და მრავალწლიანი კულტურები.