ირაკლი ქადაგიშვილი და გელა სამხარაული თუშეთის საბაგირო გზის მშენებლობისთვის წინასწარი კვლევის მიზნით, გეოლოგებთან ერთად ადგილზე იმყოფებოდნენ

თელავის-ახმეტის-ყვარელისა და ლაგოდეხის მაჟორიტარი დეპუტატობის კანდიდატი, ირაკლი ქადაგიშვილი და ახმეტა-თელავის მოქმედი მაჟორიტარი დეპუტატი, გელა სამხარაული თუშეთის საბაგირო გზის მშენებლობისთვის წინასწარი კვლევის მიზნით გეოლოგებთან ერთად, თუშეთის გზაზე იმყოფებოდნენ.

ირაკლი ქადაგიშვილმა და გელა სამხარაულმა, დარგის სპეციალისტებთან ერთად, თუშეთის გზაზე მოინახულეს ყველა ის შესაძლო გადაკვეთის წერტილები, რომელიც გათვალისწინებული იქნება საბაგირო გზის მშენებლობის პროექტში.

თუშეთში გეოლოგების მიერ ასევე შემოწმდება გარემოზე ზემოქმედების ფაქტორი, რამდენად მდგრადია სადგურების შესაძლო განთავსების ადგილების გარშემო არსებული ვითარება, თუ არსებობს ისეთი ხელისშემშლელი ფაქტორები, როგორიცაა - მეწყერული, ღვარცოფული ქვათაცვენითი პროცესები.

„თუშეთის გზაზე იგეგმება საბაგირო გზის მშენებლობა, რომელიც გარკვეულ სირთულეებთან არის დაკავშირებული. ამიტომ მიმდინარეობს წინასწარი, დეტალური შესწავლა. დარგის სპეციალისტებთან ერთად, გავდივართ იმ შესაძლო მარშრუტს და ყველა იმ გადაკვეთის წერტილს, სადაც შესაძლოა მოხდეს ანძების განთავსება. ეს მონაცემები დამუშავდება, მოხდება განხილვა, რამდენად შეესაბამება გარემოსდაცვით სტანდარტებს და ამის შემდეგ დაიწყება მუშაობა, კონკრეტული პროექტის შედგენაზე“, - აღნიშნა ირაკლი ქადაგიშვილმა.

„ეს თუშეთისთვის ისტორიული მნიშვნელობის პროექტია, მას შემდეგ რაც აქ საავტომობილო გზის გაყვანა მოხდა, ასეთი მასშტაბური პროექტი არ განხორციელებულა. საბაგირო გზა ადგილობრივებს მისცემს შესაძლებლობას გადაადგილდნენ კომფორტულად, ასევე ეს იქნება შესაძლებლობა ვიზიტორებისთვის მოინახულონ უნიკალური მხარე და ტურიზმი კიდევ უფრო განვითარდეს“, - განაცხადა გელა სამხარაულმა.