ნინო ლაცაბიძე: დასახული პრიორიტეტების ნაბიჯ-ნაბიჯ შესრულებით, 2024 წელს ევროკავშირის სრულუფლებიან წევრობაზე დასაბუთებული განაცხადის გაკეთების საშუალება გვექნება

ღრმად ვარ დარწმუნებული, რომ დასახული პრიორიტეტების ნაბიჯ-ნაბიჯ შესრულებით ჩვენ 2024 წელს ევროკავშირის სრულუფლებიან წევრობაზე დასაბუთებული განაცხადის გაკეთების საშუალება გვექნება, - ამის შესახებ „ქართული ოცნების“ მაჟორიტარობის კანდიდატმა რუსთავში, ნინო ლაცაბიძემ რუსთავში, „ქართული ოცნების“ საარჩევნო პროგრამის პრეზენტაციაზე განაცხადა.

მისი თქმით, „ქართულმა ოცნებამ“ კონკრეტული ნაბიჯები გადადგა ძლიერი ეკონომიკის შესაქმნელად.

„დღეს ჩვენი გუნდი წარმოადგენს პრეზენტაციას ეკონომიკური, ინფრასტრუქტურის, ჯანდაცვისა და გარემოს დაცვის პოლიტიკის მიმართულებით, რაც საერთო ჯამში ჩვენი ქვეყნის მდგრად განვითარებაზეა ორიენტირებული.

ღრმად ვარ დარწმუნებული, რომ ამ დასახული პრიორიტეტების ნაბიჯ-ნაბიჯ შესრულებით ჩვენ 2024 წელს ევროკავშირის სრულუფლებიან წევრობაზე დასაბუთებული განაცხადის გაკეთების საშუალება გვექნება, რაც ნიშნავს, რომ თითოეული ოჯახის ცხოვრება მიუახლოვდება ევროკავშირის წევრი ქვეყნების ყოველდღიურობას. ამისთვის კი აუცილებელია ძლიერი ეკონომიკა და ჩვენ ამ მიმართულებით გადავდგით კონკრეტული ნაბიჯები“, - განაცხადა ნინო ლაცაბიძემ და „ქართული ოცნების“ მმართველობის პერიოდში ეკონომიკური მიღწევების შესახებ მომზადებული კლიპი წარადგინა.

„2012 წლიდან ქართული ეკონომიკა გაორმაგდა და 26-დან 50 მილიარდამდე გაიზარდა. ეკონომიკის გაორმაგების პარალელურად მთლიანი შიდა პროდუქტის მოცულობა ერთ სულ მოსახლეზე მნიშვნელოვნად 5810 საერთაშორისო დოლარით გაიზარდა. მნიშვნელოვანი წინსვლა დაფიქსირდა საგარეო ვაჭრობის მიმართულებით, 60 %-ით გაიზარდა ქართული პროდუქციის ექსპორტი. 132 %-ით გაიზარდა ექსპორტი ევროკავშირის ქვეყნებში. მნიშვნელოვნად, 80%-ით გაიზარდა მომსახურების ექსპორტი. მათ შორის 131 %-ით გაიზარდა და 3, 2 მილიარდ დოლარს მიაღწია საერთაშორისო მოგზაურებიდან მიღებულმა შემოსავალმა. „ქართული ოცნების“ 8-წლიანი მმართველობის განმავლობაში 11,2 მილიარდი აშშ დოლარი ინვესტიცია შემოვიდა. ამ პერიოდში განხორციელდა იმაზე მეტი უცხოური ინვესტიცია, ვიდრე 2012 წლამდე დამოუკიდებელი საქართველოს ისტორიაში. უმუშევრობის მაჩვენებელი 17,2%-დან 11, 6%-მდე შემცირდა. შეიქმნა 222 ათასზე მეტი სამუშაო ადგილი ბიზნესში. 2018 წელს ბიზნესსექტორში დასაქმებულთა რიცხვმა პირველად გადააჭარბა თვითდასაქმებულთა რაოდენობას. დაინერგა მოგების გადასახადის ესტონური მოდელი. მხოლოდ 2019 წელს მოგების რეინვესტირების მაჩვენებელმა 612 მილიონი შეადგინა. სიმბოლურ, 1 %-მდე შემცირდა მცირე ბიზნესის გადასახადი, დაინერგა ბიზნესის ხელშეწყობის პროგრამები. ბიუჯეტის ზრდის პარალელურად თითქმის სამჯერ გაიზარდა მოქალაქეების ჯანდაცვასა და სოციალურ უზრუნველყოფაზე მიმართული ხარჯები. გაიზარდა პენსიებისა და სოციალური მხარდაჭერის პაკეტები. შეიქმნა საყოველთაო ჯანდაცვის სისტემა. ეკონომიკური და სამუშაო ადგილების ზრდის შედეგად მსოფლიო ბანკის მონაცემებით განახევრდა სიღარიბის ყველა მაჩვენებელი“, - ნათქვამია „ქართული ოცნების“ მიერ მომზადებულ კლიპში.