ქუთაისის საკრებულოს თავმჯდომარის მოვალეობის შემსრულებელი მზად არის როგორც ექიმი ჩაერთოს კოვიდ პანდემიასთან ბრძოლაში

ქუთაისის საკრებულოს თავმჯდომარის მოვალეობის შემსრულებელმა ირაკლი შენგელიამ საკრებულოს სხდომაზე განაცხადა, რომ მზად არის როგორც ექიმი ჩაერთოს კოვიდ პანდემიასთან ბრძოლაში.

„ჯანდაცვის სისტემის გამართული ფუნქციონირების საქმეში მმართველი რგოლი აქტიურ მონაწილეობას იღებს, ვინაიდან ინფიცირებული პაციენტების მკურნალობის ყველა ეტაპზე, მაღალია რადიოლოგიური კვლევების წილი, როგორც ექიმ რადიოლოგი, მზად ვარ ჩემი კომპეტენციის ფარგლებში, ნებისმიერი ფორმით და დროით, დამატებითი პირობების გარეშე ჩავერთო პანდემიასთან ბრძოლის საქმეში და დავეხმარო პირველადი ჯანდაცვის თუ ჰოსპიტალური სექტორის წარმომადგენლებს, სადაც ამის საჭიროება ყველაზე მეტად ექნებათ.

COVID19 ვირუსის მეორე ფაზის გააქტიურებასთან და ახალი შემთხვევების მატებასთან ერთად, სახელმწიფო აკეთებს ყველაფერს, რათა ჯანდაცვის სექტორმა ნაკლები დანაკარგით და მაქსიმალურად ეფექტიანად უპასუხოს პანდემიის გლობალურ გამოწვევას. კლინიკური ჩვენების მქონე ყველა ინფიცირებული პაციენტის დროული ჰოსპიტალიზაციისთვის მთელი ქვეყნის მასშტაბით ეწყობა დამატებით კოვიდ მიმღები ცენტრები.

ამ პერიოდში ბრძოლის წინა ხაზზე, სწორედ, ჯანდაცვის სფეროს წარმომადგენლები არიან და ყველაზე დიდ დარტყმასაც ეს სექტორი იღებს. ჯანდაცვის სისტემის გამართული ფუნქციონირება არის სასიცოცხლო მნიშვნელობის და ამ პროცესში თანაბრად არის ჩართული მმართველი რგოლიც, როგორც ცენტრალურ, ასევე ადგილობრივ დონეზე.

ვგრძნობ რა ამ გამოწვევის მნიშვნელობას და პროფესიულ პასუხისმგებლობას, მზად ვარ, როგორც ექიმი ჩავერთო კოვიდ პანდემიასთან ბრძოლის საქმეში. მივმართავ პირველადი ჯანდაცვის თუ ჰოსპიტალური სექტორის წარმომადგენლებს, ვიქნები თქვენ გვერდით როგორც ექიმ რადიოლოგი და რენტგენ ლაბორანტი, ჩემი კომპეტენციის ფარგლებში შევასრულებს პროფესიული საქმიანობას, ნებისმიერი ფორმით და დროით, დამატებითი პირობების გარეშე, იმ ნაწილში სადაც ამის საჭიროება ყველაზე მეტად გექნებათ!“, - აცხადებს ირაკლი შენგელია.

ირაკლი შენგელია არის პროფესიით რადიოლოგი, საქართველოს რადიოლოგთა ასოციაციისა და ევროპის რადიოლოგთა ასოციაციის წევრი; მას პროფესიული განათელბა მიღებული აქვს თბილისის სახელმწიფო სამედიცინო უნივერსიტეტში და ბელორუსის სახელმწიფო სამედიცინო უნივერსიტეტში. 2009 წლიდან მუშაობდა სხვადასხვა პოზიციაზე მინსკისა და ქუთაისის მულტიპროფილურ კლინიკებში, 2014-2018 წლებში იყო კლინიკა ბომონდის რადიოლოგიური დეპარტამენტის ხელმძღვანელი.