ირაკლი ჩიქოვანი: უმთავრეს ვალდებულებას წარმოადგენს, რომ ვიყო თითოეული ზუგდიდელის კეთილსინდისიერი ხმა საქართველოს პარლამენტში

„ქართული ოცნება-დემოკრატიული საქართველოს" ზუგდიდის მაჟორიტარი დეპუტატობის კანდიდატმა, ირაკლი ჩიქოვანმა საპარლამენტო არჩევნების მეორე ტური შეაფასა და ამომრჩევლებს მხარდაჭერისთვის მადლობა გადაუხადა.

„ზუგდიდში არჩევნებმა მშვიდ ვითარებაშ ჩაიარა. მინდა მადლობა ვუთხრა ყველა იმ ზუგდიდელს, რომელმაც მხარი დამიჭირა და მოვიდა მეორე ტურში. ხაზი მინდა გავუსვა იმას. რომ ზუგდიდელებმა უფრო დიდი რაოდენობით დაგვიჭირეს მხარი, ვიდრე პირველ ტურში და ეს ჩემთვის უდიდესი პატივია. თუმცა ჩემ უმთავრეს ვალდებულებას წარმოადგენს, რომ მე ვიყო მთლიანად ზუგდიდისა და თითოეული ზუგდიდელის კეთილსინდისიერი ხმა საქართველოს პარლამენტში. ეს ჩემთვის არის უდიდესი პასუხისმგებლობა და ყველაფერს გავაკეთებ, რომ ვემსახურო ჩემს ზუგდიდელებს“, - განაცხადა ირაკლი ჩიქოვანმა.

ირაკლი ჩიქოვანმა მეორე ტურში ამომრჩევლების დაბალი აქტივობის მიზეზად რამოდენიმე ფაქტორი დაასახელა, მათ შორის კორონავირუსთან დაკავშირებული ვითარება და ასევე ოპონენტი კანდიდატის მხარდამჭერთა ბოიკოტი კენჭისყრის პროცესზე.

„მინდა ხაზგასმით აღვნიშნო, ბოიკოტს ჰქონდა თავისი ეფექტი რა თქმა უნდა, მაგრამ მიუხედავად ამისა, ყველამ კარგად უნდა გავათვითცნობიეროთ ერთი რამ, ადამიანებმა ვინც მხარი დაგვიჭირეს პირველ ტურში, რომლებმაც მოგვცეს საშუალება პროპორციული წესით წარვდგენილიყავით პარლამენტში, პირველ რიგში უნდა ვცეთ მათ პატივი. ამავდროულად ჩემს ვალდებულებას წარმოადგენს იმ ათობით ათასი ზუგდიდელის წარმომადგენელი ვიყო საქართველოს პარლამენტში, რა თქმა უნდა გარკვეული ეფექტი აქვს იმ პანდემიასაც, რომელიც არის ჩვენს ქვეყანაში. არჩევნები არის დემოკრატიის გამოვლინების უპირველესი ფორმა და არჩევნები არის ხალხის მმართველობის პირდაპირი განსახორციელებელი გზა, აქედან გამომდინარე კიდევ ერთხელ დიდი მადლობა მათ“, - აღნიშნა ირაკლი ჩიქოვანმა.

მისივე თქმით, მომდევნო 4 წლის განმავლობაში, მისი მთავარი პრიორიტეტი, ზუგდიდის როგორც სოციალურ-ეკონომიკური, ასევე ტურისტული მიმართულებით სხვადასხვა სახელმწიფო პროგრამები და პროექტები იქნება, რომელთა განხორციელებას ის მმართველ გუნდთან ერთად აპირებს.

„უკვე სამ თვეზე მეტია ჩვენ საარჩევნო კამპანიას ვაწარმოებთ და არაერთი შეხვედრა გვქონია და არაერთი ღონისძიება, რომელიც პირდაპირ და ღიად გვისაუბრია, თუ რა იქნებოდა პრიორიტეტი ზუგდიდის მაჟორიტარის, ირაკლი ჩიქოვანის. ეს პრიორიტეტები გახლავთ: ხელი შევუწყოთ ჩვენი ქალაქის კიდევ უფრო მეტ განვითარებას და შევინარჩუნოთ ის განვითარების დინამიკა, რომელიც გვაქვს. მეორე მხრივ ხელი შევუწყოთ და მაქსიმალურად დავეხმაროთ დევნილ ოჯახებს და მაქსიმალურად აღმოვფხვრათ საცხოვრისით უზრუნველყოფის პრობლემა. მესამე არის კიდევ უფრო მეტი ეკონომიკური აქტივობა იმ პროგრამებისა და კონკრეტული სუბსიდიების დახმარებით, რომელსაც სახელმწიფო ახორციელებს და მეოთხე-ჩვენ უნდა გავზარდოთ ზუგდიდის ტურისტული პოტენციალი. თუმცა უნდა აღვნიშნო, რომ ეს შეუძლებელი იქნება „ქართული ოცნების“ გუნდის მხარდაჭერის გარეშე“, - განაცხადა ირაკლი ჩიქოვანმა.

საქართველოს მასშტაბით, საპარლამენტო არჩევნების მეორე ტურის კენჭისყრის პროცედურა დასრულდა. ამომრჩეველს ხმის მიცემის უფლება სწორედ 20:00 საათამდე ჰქონდა. 17 მაჟორიტარულ ოლქში მეორე ტურში 7 პარტიის წარმომადგენლები გავიდნენ. თუმცა ოპოზიცია არჩევნებს გაყალბებულს უწოდებს და მეორე ტურში არ მონაწილეობს.

21 ნოემბრის არჩევნების მეორე ტურზე, ამომრჩევლებს 1 914 საარჩევნო უბანი ემსახურებოდა. ამომრჩეველთა საერთო რაოდენობა 2 140 210 იყო.