ჩხოროწყუს მერიის თანამშრომელი: მინდოდა, მოსწავლეებისთვის მარცვალი ჩამედო, რომ არცერთი სამუშაო სათაკილო არ არის

ჩხოროწყუს მერიის თანამშრომელი, რომელმაც მეორე საჯაროს სკოლის მოსწავლეები მერიის ტუალეტების დასასუფთავებლად წაიყვანა, აცხადებს, რომ იგი თვითნებურად მოქმედებდა.

ეთერ ჯაფარიძის თქმით, მერიის ხელმძღვანელობა აღნიშნულის შესახებ ინფორმირებული არ იყო.

„შევუთანხმდი სკოლის დირექტორს, ქალბატონ ნონა თოდუას. ბავშვების მშობლებთან დარეკილი იყო. ბავშვები მოვიყვანე მერიაში. მინდოდა, მათთვის მარცვალი ჩამედო, რომ არცერთი სამუშაო სათაკილო არ არის. ეს იყო ჩემი სურვილი, ეს რაღაც შინაგანად მოდიოდა. ამის შესახებ არც მერიის აპარატის უფროსმა და არც დაცვის სამსახურმა არფერი იცოდა.

მე არ მითქვია მათთვის ტუალეტში შესვლა. უბრალოდ, საჩვენებლად მინდოდა მათთვის მომეწმინდა. ეგ იყო, სხვა არაფერი“, - განაცხადა ეთერ ჯაფარიძემ.

ეთერ ჯაფარიძემ მშობლებთან შეთანხმებით მეშვიდე კლასის 10 ბავშვი წაიყვანა მერიის შენობაში, სადაც ფოიეში ჩაუტარა სწავლება დასუფთავებაზე. ის აცხადებს, რომ არასწორად შეარჩია ობიექტი, რის პასუხისმგებლობასაც გრძნობს და მზადაა კანონის შესაბამისად პასუხი აგოს.

აღნიშნულ ფაქტთან დაკავშირებით, დაწყებულია მოკვლევა და საქმეს შსს იძიებს. სკოლის დირექციასა და მერიაში კატეგორიულად უარყოფენ ფაქტს და აღნიშნავენ, რომ მოსწავლეები მერიაში კონკრეტულმა პირმა, თვითნებურად მიიყვანა. საქმეზე გამოძიება 150-ე მუხლით დაიწყო, რაც იძულებას გულისხმობს.