რუსთავში, 80 ოჯახს, წლების განმავლობაში დაუკანონებელი ფართები საკუთრებაში გადაეცა

რუსთავში, 80 ოჯახს, წლების განმავლობაში დაუკანონებელი ფართები საკუთრებაში გადაეცა. შესაბამისი განკარგულება, საქართველოს მთავრობამ მიიღო და საცხოვრებელი ფართები, აღნიშნულ ოჯახებს სიმბოლურ ფასად - 1 ლარად გადაეცათ.

„ეს ის ოჯახებია, რომლებიც წლების წინ ორდერით თუ უორდეროდ შესახლდნენ თავისუფალ ფართებში, მოუარეს ამ შენობებს და დღეს, რომ საცხოვრებლად ვარგისია, სწორედ მათი დამსახურებაა. მიუხედავად ამისა, ისინი ვერ ახერხებდნენ ფართების დაკანონებას, ვერ განკარგავდნენ, არ იყვენენ მესაკუთრეები. საკითხი დაძრულია და დღეს კიდევ 80 ოჯახს, რომელთაც უკვე გაიარეს ეს ბარიერები, ბინები საკუთრებაში გაეცა“, - განაცხადა ქვემო ქართლის გუბერნატორმა შოთა რეხვიაშვილმა.

რუსთავის მერიის ქონების მართვის სამსახურში, ფართის დასაკანონებლად საჭირო პროცედურები, კიდევ 161 ოჯახის განაცხადზე მიმდინარეობს.

„ძალიან კარგი კომუნიკაცია შედგა მთავრობასთან, რის შედეგადაც ამ ბინების სიმბოლურ ფასად - ერთ ლარად საკუთრებაში გადაცემა მოხდა. სულ 2020-2021 წლებში დაკავებული ფართები, საკუთრებაში 183 ოჯახს გადაეცა. მიხარია, რომ აქტიურად მიმდინარეობს იმ ფართების საკუთრებაში გადაცემა, რომელშიც წლების განმავლობაში მოქალაქეები ცხოვრობდნენ“, - განაცხადა რუსთავის მერმა ირაკლი ტაბაღუამ.

80 ოჯახს რომლებსაც ფართების გადაცემის შესახებ, დღეს აცნობეს, ბინის კანონიერი მფლობელობისთვის, მხოლოდ საჯარო რეესტრის შესაბამისი რეგისტრაცია დასჭირდება.

„ჩვენ აქტიურად გავდიოდით მოსახლეობაში და ვხვდებოდით მათ. მიხარია, რომ დღეს 80 ოჯახს, ფართები, რომელსაც წლების განმავლობაში ფლობდნენ გადავეცით საკუთრებაში. ამ პროცესში მთელი ჯგუფი იყო სამთავრობო და მუნიციპალურ დონეზე ჩართული. მე მინდა მივულოცო თითოეულ მათგანს, ეს პროცესი კვლავ გაგრძელდება“, - განაცხადა ნინო ლაცაბიძემ.

საცხოვრებელი ფართები, რომელთა დაკანონებაც, ათწლეულების განმავლობაში არ ხერხდებოდა, დღეისათვის რუსთავში 183 ოჯახს გადაეცა საკუთრებაში.