როგორ ცხოვრობდნენ აღსაზრდელები ნინოწმინდის ბავშვთა პანსიონში - „იმედის კვირის“ სიუჟეტი

თუ როგორ ცხოვრობდნენ ნინოწმინდის ბავშვთა პანსიონში აღსაზრდელები, საზოგადოებამ ტელეკომპანია „იმედის“ ეთერში გასული სიუჟეტის შედეგად გაიგო.

ვიდეოჩანაწერში რამდენიმე მოზარდი ჰყვება, რომ პანსიონში დასჯის მეთოდები განსხვავებული იყო. აღმზრდელების მხრიდან ადგილი ჰქონდა ფიზიკურ დასჯას, კვების გამოტოვებას და სხვა სახის სანქციებს. თუმცა, მოზარდები ამბობენ, რომ შესაძლო ძალადობის შესახებ მეუფე სპირიდონმა არაფერი იცოდა. მისი ვიზიტისას ბავშვებზე ძალადობის კვალს გრიმით შლიდნენ.

მასალის ეთერში გასვლის შემდეგ შინაგან საქმეთა სამინისტრომ პანსიონში აღსაზრდელების მიმართ შესაძლო დანაშაულის ჩადენის კიდევ ერთ ფაქტზე, გამოძიება 126-ე მუხლით დაიწყო. საგამოძიებო მოქმედებები აქტიურად მიმდინარებს.

ადგილზე სიტუაციის შესასწავლად ჩავიდნენ სასულიერო პირები, პარლამენტარები, ჯანდაცვის სამინისტროსა და არასამთავრობო სექტორის წარმომადგენლები. კოალიციამ - პარტნიორობა ადამიანის უფლებებისთვის კი, უკვე მიიღო სასამართლოსგან უფლება, რომ სპეციალური საჭიროების მქონე ბავშვები პანსიონიდან გაიყვანონ. ნინოწმინდის ბავშვთა სახლში ამ დრომდე რჩებიან სოციალური მუშაკები და სიტუაციას ზედმიწევნით სწავლობენ. ბენეფიციართა ნაწილმა სურვილის მიხედვით დაწესებულება უკვე დატოვა.

ჯანდაცვის სამინისტროს ინფორმაციით, სახელმწიფო ზრუნვის სააგენტომ ნინოწმინდის პანსიონიდან, ჯამში, 11 არასრულწლოვნის გამოყვანა უზრუნველყო, რომელთა შორის შეზღუდული შესაძლებლობის სტატუსის მქონე ერთი ბავშვია.

დღეს საპატრიარქომ გამოაქვეყნა განცხადება, რომელშიც წერია, რომ გაასაჩივრებენ სასამართლოს გადაწყვეტილებას, რომელიც ნინოწმინდის პანსიონიდან ბენეფიციართა გამოყვანის პროცესს ეხება.

თბილისის საქალაქო სასამართლოს დროებითი განჩინების მიხედვით, „პარტნიორობა ადამიანის უფლებებისთვის“ შუამდგომლობა ნინოწმინდის ბავშვთა პანსიონიდან ყველა ბავშვის გაყვანასთან დაკავშირებით ნაწილობრივ დაკმაყოფილდა.

შეგახსენებთ, არასამთავრობო ორგანიზაციამ „პარტნიორობა ადამიანის უფლებებისთვის“ თავმჯდომარე ანა აბაშიძემ 5 მაისს გამართულ პრესკონფერენციაზე განაცხადა, რომ სასამართლომ ნინოწმინდის პანსიონიდან ბავშვების გაყვანის გადაწყვეტილება მიიღო.

PHR-მა 4 ივნისს მიმართა სასამართლოს შუამდგომლობით და მოითხოვა, უზრუნველყოფის ღონისძიების სახით ნინოწმინდის ბავშვთა პანსიონიდან დაუყოვნებლივ ყველა ბავშვის გამოყვანა.

ნინოწმინდის ბავშვთა პანსიონში, სავარაუდო ძალადობის შესახებ, თავად ბენეფიციარები „ქრონიკასთან“ ალაპარაკდნენ. ერთ-ერთი ასეთი ფაქტი, მათივე თქმით, ორი დღის წინ მოხდა. არასრულწლოვნები ამბობენ, რომ შემთხვევების შესახებ მეუფე სპირიდონი არ იყო ინფორმირებული, მათზე აღმზრდელები ზემოქმედებნენ. რომელთა ნაწილი გათავისუფლებულია, თუმცა ნაწილი ისევ ადგილზე რჩება. კითხვაზე - იცოდა თუ არა მეუფე სპირიდონმა ამ ფაქტების შესახებ, ბავშვები ამბობენ, რომ მათ ვერ შეძლეს მეუფესთვის ეთქვათ, როგორ ძალადობდნენ მათზე აღმზრდელები და ასევე ვერ მოახერხეს, რომ ეს ამბავი ვინმესთვის ეთქვათ.

3 ივნისს შსს-მ ნინოწმინდის ბავშვთა პანსიონში აღსაზრდელების მიმართ შესაძლო დანაშაულის ჩადენის ფაქტებზე გამოძიება დაიწყო.

სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს 4 მაისს გავრცელებული განცხადების თანახმად, ნინოწმინდის პანსიონის დატოვების სურვილი 6-მა არასრულწლოვანმა გამოთქვა და სააგენტომ უკვე უზრუნველყო მათი სხვა ზრუნვის ფორმაში გადაყვანა. ამავე განცხადების მიხედვით, კიდევ 10 ბავშვის გადაყვანაზე მიმდინარეობდა მუშაობა. 4 ივნისს ჯანდაცვის სამინისტროს წარმომადგენლებმა ნინოწმინდის პანსიონიდან რამდენიმე არასრულწლოვანი გამოიყვანეს.