იტალიის ელჩი ციცაგიანთკარის წყალმომარაგების პროექტზე: ჩვენთვის ამ პროექტებში მონაწილეობა საამაყოა

იტალიის ელჩი საქართველოში, ენრიკო ვალვო აღნიშნავს, რომ ციცაგიანთკარის წყალმომარაგების პროექტი ათობით ოჯახის მდგომარეობას გააუმჯობესებს. მისივე თქმით, ამაყია იმით, რომ მის განხორციელებაში იტალიაც იყო ჩართული.

„ეს პროექტი მართლაც ძალიან მნიშვნელოვანია. ვამაყობ, რომ ჩვენ, USAID-თან და სხვა, ადგილობრივ, სახელმწიფოს წარმომადგენლებთან და სხადასხვა პარტნიორთან ერთად, დავაფინანსეთ პროექტი, რომლის ფარგლებშიც, 144 ოჯახი შეძლებს, მიიღოს წყალი, რითაც მათი მდგომარეობა გაუმჯობესდება. ჩვენთვის ამ პროექტებში მონაწილეობა საამაყოა. ხაზგასასმელია, თუ რამდენად მნიშვნელოვანია საქართველოსთვის მხარდაჭერა - თუ გავითვალისწინებთ საქართველოს ტერიტორიულ მთლიანობასა და იმას, რომ ეს სოფელი სწორედ ადმინისტრაციულ გამყოფ ხაზთან იმყოფება. სწორედ ამიტომ, ხაზს ვუსვამთ ამ პროექტის მნიშვნელობას“, - აღნიშნა იტალიელმა დიპლომატმა.

ციცაგიანთკარში წყლის ახალი სისტემა მოეწყო. ადგილობრივებს შერიგებისა და სამოქალაქო თანასწორობის საკითხებში სახელმწიფო მინისტრი თეა ახვლედიანი, ჰელგა მარია შმიდთან და საქართველოში აშშ-ის ელჩთან კელი დეგნანთან ერთად შეხვდა.

პროექტი გორის მუნიციპალიტეტმა, ევროპის უსაფრთხოებისა და თანამშრომლობის ორგანიზაციისა (ეუთო) და USAID-ის პროექტ „ზრდა“-ს მხარდაჭერით განახორციელა. პროექტის გახსნის ცერემონიას, სახელმწიფო მინისტრთან თეა ახვლედიანთან ერთად, დაესწრნენ ეუთოს გენერალური მდივანი ჰელგა მარია შმიდი, აშშ-ის ელჩი საქართველოში კელი დეგნანი, იტალიის ელჩი საქართველოში ენრიკო ვალვო, საქართველოს რეგიონული განვითარებისა და ინფრასტრუქტურის მინისტრის მოადგილე მზია გიორგობიანი, შიდა ქართლის გუბერნატორი ვალერიან მჭედლიძე და გორის მერი კონსტანტინე თავზარაშვილი.