თორნიკე რიჟვაძე: სამხარაულის ეროვნული ბიუროდან მოწვეული გვყავს ექსპერტები, რომლებიც გვერდით, ცალკე მდებარე კორპუსების უსაფრთხოების შესახებ დასკვნებს ძალიან მალე გადმოგვცემენ

მინდა, კიდევ ერთხელ მივუსამძიმრო გარდაცვლილთა ოჯახებს. მთელი ქვეყანა, ბათუმი, ბათუმელები ვგლოვობთ და ვლოცულობთ მათი სულებისთვის. ეს იყო მართლაც უმძიმესი დღეები, - ამის შესახებ თორნიკე რიჟვაძემ „ქრონიკაში“ განაცხადა. აჭარის მთავრობის მეთაურმა აღნიშნა, რომ გვერდით მდებარე შენობების უსაფრთხოების შესასწავლად ექსპერტიზის ეროვნული ბიუროს თანამშრომლები არიან მოწვეულები.

„ჩვენ ყველაფერს გავაკეთებთ, როგორც გარდაცვლილთა ოჯახებისთვის, ასევე აქ მცხოვრები ოჯახებისთვის. მოწვეული გვყავს ექსპერტები სამხარაულის ეროვნული ბიუროდან, რომლებიც ძალიან მალე შეაფასებენ და დასკვნის სახით ​გადმოგვცემენ გვერდით, ცალკე მდებარე კორპუსების უსაფრთხოების შესახებ დასკვნებს. პირველადი მონაცემებით, იქ უსაფრთხოების წესები არის დაცული და მოქალაქეები შეძლებენ დაბრუნებას როგორც კლდიაშვილის, ასევე მემედ აბაშიძის ქუჩაზე განლაგებულ კორპუსებში. ასევე, ცოტა მოგვიანებით გადმოგვცემენ შესაბამის დასკვნას ნანგრევების ირგვლივ არსებული შენობის უსაფრთხოებასთან დაკავშირებით და იქაც მივიღებთ კონკრეტულ გადაწყვეტილებას“, - განმარტა რიჟვაძემ.

ბათუმში, 26 მაისის ქუჩაზე, 13 ნომერი კორპუსის ერთი სადარბაზო 8 ოქტომბერს, დაახლოებით, 12:00 საათზე ჩამოინგრა. სამაშველო ოპერაციის შედეგად, მაშველებმა ნანგრევებიდან 10 ადამიანის ამოყვანა შეძლეს, რომელთაგან 8 უკვე გარდაცვლილი იყო, ერთი ადამიანი საავადმყოფოში გარდაიცვალა. ერთი ადამიანი ამ დრომდე ექიმების მეთვალყურეობის ქვეშ რჩება - ზვიად თავდგირიძე ერთადერთია, რომელიც ნგრევის დროს კორპუსში იყო და გადარჩა. ის ხელოვნური ვენტილაციიდან მოიხსნა და დადებითი დინამიკა აქვს.

აჭარის მთავრობა და ბათუმის მერია ტრაგედიის შედეგად დაზარალებულ ოჯახებს ბინებს და კომპენსაციას გადასცემენ.