თეკლათისა და ჭალადიდის საარჩევნო ოლქში „ქართული ოცნების“ მაჟორიტარი დეპუტატობის კანდიდატად ზაზა ყურაშვილი წარადგინეს

„ქართული ოცნების“ თავმჯდომარემ, პარტიის ოფისში გამართულ ბრიფინგზე, დაასახელა, თუ ვინ იქნება „ქართული ოცნების“ მაჟორიტარი დეპუტატობის კანდიდატი სენაკის მუნიციპალიტეტის საკრებულოს შუალედურ არჩევნებში.

ირაკლი კობახიძის განცხადებით, თეკლათისა და ჭალადიდის მაჟორიტარულ საარჩევნო ოლქში მმართველი პარტიის კანდიდატი ზაზა ყურაშვილი იქნება.

„ბატონი ზაზა ჩვენი პარტიის ერთგული და აქტიური წევრია, რომელიც საკუთარ თემში მაღალი ავტორიტეტით სარგებლობს. დარწმუნებულები ვართ, რომ ის აუცილებლად მოიგებს არჩევნებს“, - განაცხადა ირაკლი კობახიძემ.

„ქართული ოცნების“ თავმჯდომარის განცხადებით, შუალედური არჩევნების შემდეგ, სენაკის მუნიციპალიტეტში „ქართული ოცნება“ მყარ უმრავლესობას ჩამოაყალიბებს.

„ამით დასრულდება თითქმის ერთწლიანი საბოტაჟი, რომელსაც „ნაციონალური მოძრაობა“ და მისი სატელიტი პარტია „საქართველოსთვის“ ტანდემში, მუნიციპალიტეტის მოსახლეობის ინტერესების წინააღმდეგ ახორციელებდნენ. თეკლათისა და ჭალადიდის მოსახლეობას ბატონი ზაზა ყურაშვილის მხარდაჭერისკენ მოვუწოდებთ“, - განაცხადა ირაკლი კობახიძემ.