ირაკლი ქარსელაძე: უახლესი ინფორმაციით, იმ 50 ადამიანიდან, რომლებსაც ვერ ვუკავშირდებოდით, 6 ადამიანი უკვე კავშირზეა და უსაფრთხოდ არიან

უახლესი ინფორმაციით, იმ 50 ადამიანიდან, რომლებსაც ვერ ვუკავშირდებოდით, 6 ადამიანი უკვე კავშირზეა და უსაფრთხოდ არიან, - ამის შესახებ რეგიონული განვითარებისა და ინფრასტრუქტურის მინისტრმა ირაკლი ქარსელაძემ ჟურნალისტებს განუცხადა.

„ძალიან დიდი სტიქია განვითარდა. მდინარის სტიქიურმა დაგუბებამ გამოიწვია მეწყრული პროცესი, რომელიც ძალიან მოკლე პერიოდში განვითარდა და დიდი გეოგრაფიული არეალი დაფარა. 400 მაშველი არის ჩართული სამაშველო ოპერაციაში. 2 ვერტმფრენი იყო ჩართული დღეს, ხვალ ემატება კიდევ ვერტმფრენები. ჩატარებული ოპერაციის შედეგად, დღეის მდგომარეობით, ბუნებრივია მონაცემები ყოველ წუთობრივად ახლდება, მიდის შემოწმება და ამ მდგომარეობით 70 ადამიანი გამოიყვანეს დღეს. 152 ადამიანია, რომელიც ამჟამად იმყოფება უსაფრთხო ადგილას, სტიქიის არეალში, სამაშველო სამსახურის წარმომადგენლებთან და პოლიციის თანამშრომლებთან ერთად და უზრუნველყოფილი არიან ყველა იმ საშუალებით, რაც ღამის განმავლობაში დასჭირდებათ და უკვე ხვალ ამინდიდან გამომდინარე მომზადებულია ვერტმფრენები იმისათვის, რომ მათი გამოყვანა მოხდეს. არიან ადამიანები, რომლებსაც ვერ ვუკავშირდებით, დაახლოებით 50-მდე ადამიანი იყო, თუმცა, უახლესი ინფორმაცია არის ის, რომ 6 ადამიანი, რომელსაც ვერ ვუკავშირდებოდით უკვე კავშირზეა და უსაფრთხოდ არიან. ბუნებრივია, ეს პროცესი გრძელდება. მიუხედავად ღამისა 150-მდე მაშველი იმყოფება სტიქიის არეალში, როგორც უსაფრთხო არეალში გამოყვანილი ადამიანების მხარდასაჭერად, ასევე იმ არეალში შესაძლებლობის მიხედვით სამძებრო სამუშაოების განსახორციელებლად. ძალიან სამწუხაროა, ორი ცხედარი აღმოვაჩინეთ და ხვალ არის დაგეგმილი მათი გადმოსვენება, რომლის შედეგადაც შესაბამისი პროცედურების დაცვით მოხდება ადამიანების იდენტიფიცირება. წარმოდგენილია აბსოლუტურად ყველა შესაბამისი სამინისტრო, სააგენტო და ერთობლივი ძალისხმევის შედეგია ის ყველაფერი, რაც მოვყევი. გარდა ამისა, ასევე მნიშვნელოვნად დაზარალდა ინფრასტრუქტურა, რომელიც უპირველეს ყოვლისა სტიქიის არეალში საგზაო კომუნიკაციის გამოყენებით შესვლას ზღუდავს. ორი ხიდია წაღებული, ასევე გზის მონაკვეთი რამდენიმე კილომეტრიანი, რომელიც მეწყრითაა დაფარული. უკვე მობილიზაცია მყისიერად განხორციელდა, დაიწყო შესაბამისი სამუშაოები. დაახლოებით საათნახევრის წინ კიდევ შეემატა მძიმე ტექნიკა, საუბარია ექსკავატორებზე, ბულდოზერებზე, დამტვირთველებზე და ყველა იმ აუცილებელ ტექნიკაზე, რომელიც ასეთ ვითარებაში შეიძლება იყოს გამოყენებული. ტექნიკა კიდევ გზაშია, რომელიც უკვე ღამე ჩამოვა და ხვალ დილიდან ეს ტექნიკაც ჩაერთვება სამუშაოებში. დაახლოებით 20-მდე ტექნიკაზეა საუბარი. ამ მიმართულებით, ისევე, როგორც ყველა სხვა ძალისხმევის გათვალისწინებით, არავითარი გამოწვევა არ არის რესურსის თვალსაზრისით. ჩართულია იმაზე მეტი, ვიდრე ვითარებიდან გამომდინარე ჩვენ შეგვიძლია. ძალიან სპეციფიკურია ეს ვითარება ,იგივე ტექნიკასაც მოუწვევს ამის გათვალისწინებით მთელი რიგი მუშაობა“, - აღნიშნა ქარსელაძემ.