რუსთავში უეფას მე-4 კატეგორიის სტანდარტების 8000 მაყურებელზე გათვლილი სტადიონი აშენდება

საქართველოს ინფრასტრუქტურის სამინისტროს მუნიციპალური განვითარების ფონდი, რუსთავში, უეფას მე-4 კატეგორიის სტანდარტების, 8000 მაყურებელზე გათვლილი სტადიონის პროექტირებას ახორციელებს. არქიტექტურული კონცეფციების კონკურსში გამარჯვებულმა კომპანია „სტუდიო 9“-მ წინასაპროექტო კვლევა უკვე დაასრულა.

პროექტირების დეტალები, საქართველოს ინფრასტრუქტურის მინისტრმა რევაზ სოხაძემ, რუსთავის მერთან ნინო ლაცაბიძესთან, მუნიციპალური განვითარების ფონდის აღმასრულებელ დირექტორთან ბექა ურუშაძესთან, პარლამენტში რუსთავის დელეგატთან ირაკლი შატაკიშვილთან და საკრებულოს თავმჯდომარე მამუკა რეზვიაშვილთან ერთად, ადგილზე განიხილა.

„რუსთავის საფეხბურთო მოედნის პროექტირების სამუშაოები აქტიურად მიმდინარეობს. აქ მე-4 კატეგორიის, უეფას სტანდარტების სტადიონი აშენდება. ჩვენთვის მნიშვნელოვანია, რომ ჩვენს ქალაქებში არა მხოლოდ ფუნქციურად დატვირთული სპორტული ობიექტები ავაშენოთ, არამედ ახალი არქიტექტურული ღირებულების ობიექტებიც მივიღოთ. ამაში აქტიურად არიან ჩართული დარგის სპეციალისტები: არქიტექტორები, ხელოვნებათმცოდნეები, რა თქმა უნდა თვითმმართველობის წარმომადგენლები და ერთობლივად ხდება გადაწყვეტილების მიღება თუ რომელი არქიტექტურული ნამუშევარი არის ამ ეტაპისთვის ღირებული. შემდგომში დაიწყება უკვე პროექტირება. მე იმედი მაქვს, რომ ჩვენ რუსთავში არა მხოლოდ მნიშვნელოვან სპორტულ, არამედ ლანდშაფტზე მორგებულ არქიტექტურულ ობიექტსაც მივიღებთ. რუსთავი თავისი განსხვავებული და განსაკუთრებული არქიტექტურით გამოირჩევა და ჩვენ გვინდა, რომ ქალაქში თანამედროვე, 21-ე საუკუნის არქიტექტურაც შემოვიტანოთ. მე დარწმუნებული ვარ, რომ რუსთავში ყველა ერთად, ძალიან მალე გავხსნით საინტერესო და მნიშვნელოვან სპორტულ ობიექტს“, - განაცხადა რევაზ სოხაძემ.

პირველი საფეხბურთო სტადიონი რუსთავში 1948 წელს, სწორედ იმ პერიოდში გაიხსნა, როდესაც უძველესი ქალაქის ადგილზე გაშენებულ ახალ რუსთავს, ქალაქის სტატუსი მიენიჭა.

„2026 წელს რუსთავში, ჩვენი ქალაქისთვის უპრეცედენტო, ფაქტობრივად მეგა პროექტების წელი იქნება. ეს პროექტები, რუსთაველების ცხოვრების თითქმის ყველა სფეროს მოიცავს და განსაკუთრებული აქცენტი, სპორტზე გაკეთდება. ახალი საფეხბურთო სტადიონი, რომლის მშენებლობაც პრემიერ მინისტრის გადაწყვეტილებით დაიგეგმა, ზუსტად იმ ადგილზე აშენდება, სადაც მე-20 საუკუნის 50-იან წლებში რუსთავის ფეხბურთის ისტორია დაიწყო. უეფას სტანდარტების შესაბამისი სტადიონი, უზარმაზარი ახალი შესაძლებლობა იქნება ჩვენი ქალაქისთვის, არა მხოლოდ სპორტული, არამედ ზოგადი განვითარების თვალსაზრისითაც“, - განაცხადა ნინო ლაცაბიძემ.

პროექტირების დასრულების შემდეგ, მუნიციპალური განვითარების ფონდი, სამშენებლო ტენდერს გამოაცხადებს.

„რუსთავის ცენტრალური სტადიონის მშენებლობა-რეაბილიტაციის პროექტი პროექტირების ნაწილში უკვე აქტიურ ფაზაშია. ჩვენ ამაზე მუშაობა გასული წლის აგვისტოში დავიწყეთ და ამ ეტაპზე პროექტანტს ქალაქ რუსთავის მერიიდან სამშენებლო პირობები უკვე აღებული აქვს და უშუალოდ ესკიზურ ნაწილზე მუშაობს, რომელიც უახლოეს მომავალში უნდა ჩაგვბარდეს. რაც შეეხება პროექტირების ფაზას, მისი საბოლოო ვადა არის მაისი, შესაბამისად ჩვენ აქტიურად გავივლით ყველა იმ ეტაპს, რაც საჭიროა საბოლოოდ ტენდერის გამოცხადებისთვის“, - განაცხადა ბექა ურუშაძემ.

მოგვიანებით, სამუშაო შეხვედრა გაიმართა სტუდია 9-ის ოფისშიც, სადაც არქიტექტურულ კონკურსში გამარჯვებულმა კომპანიამ საპროექტო კვლევის შედეგები, რუსთავის მერს ნინო ლაცაბიძეს, პარლამენტარებს ირაკლი შატაკიშვილსა და ალექსანდრე დალაქიშვილს, მერიის არქიტექტურის სამსახურის ხელმძღვანელს კობა ძლიერიშვილს წარუდგინა.

რუსთავში ფეხბურთს დიდი ისტორია აქვს პირველი საფეხბურთო გუნდი „მეტალურგი “ სტადიონის გახსნიდან ერთ წელიწადში - 1949 წელს დაარსდა. 1948 წელს, როდესაც რუსთავში საფეხბურთო სტადიონი გაიხსნა, ქალაქი სულ რამდენიმე ქუჩას მოიცავდა და მოსახლეობის რაოდენობა 4000 იყო. ამის მიუხედავად, საფეხბურთო ინფრასტრუქტურის მოწყობის აუცილებლობა მაინც დადგა და 3000 მაყურებელზე გათვლილი სტადიონი აშენდა.