ნინო ლაცაბიძე: ოჯახის სიწმინდის დღე იმ უდიდეს ღირებულებებს აერთიანებს, რაც ქვეყნის ერთიანობის საფუძველია

რუსთავში, ოჯახის სიწმინდისა და მშობლების პატივისცემის დღესთან დაკავშირებით, მასშტაბური მსვლელობა მოეწყო. ინფორმაციას რუსთავის მერია ავრცელებს.

მსვლელობაში რუსთავის მერმა ნინო ლაცაბიძემ, საკრებულოს თავმჯდომარე მამუკა რეხვიაშვილმა, საქართველოს პარლამენტში რუსთავის დელეგატმა ირაკლი შატაკიშვილმა ოჯახებთან ერთად, ქვემო ქართლში სახელმწიფო რწმუნებულმა ილია ჯალაღანიამ, რუსთავის საკრებულოს დეპუტატებმა, ქვემო ქართლის მუნიციპალიტეტების მერებმა და საკრებულოს თავმჯდომარეებმა მიიღეს მონაწილეობა.

„ოჯახის სიწმინდის დღე იმ უდიდეს ღირებულებებს აერთიანებს, რაც ქვეყნის ერთიანობის საფუძველია, რადგან სწორედ ეროვნულ ღირებულებებზე დაფუძნებული ოჯახების ერთობა ქმნის ძლიერ სახელმწიფოს. წელს ეს დღე კიდევ უფრო მეტ დატვირთვას ატარებს, რადგან ვაგრძელებთ ტრადიციას, რომელსაც ჩვენმა უდიდესმა პატრიარქმა, ილია მეორემ ჩაუყარა საფუძველი და დღეს უკვე ახალი პატრიარქის, უწმინდესის და უნეტარესის, შიო მესამის ლოცვა-კურთხევით გავერთიანდით მთელი საქართველო“, - განაცხადა რუსთავის მერმა ნინო ლაცაბიძემ.

მსვლელობამდე რუსთავის წმინდა მეფე ვახტანგ გორგასლის სახელობის საკათედრო ტაძარში სასულიერო პირებმა სადღესასწაულო პარაკლისი გადაიხადეს.

„ოჯახის სიწმინდისა და მშობელთა პატივისცემის დღე დღევანდელი საქართველოს რეალობაში, ყველაზე გამორჩეული დღესასწაულია. ამ დღეს სრულიად საქართველო ვერთიანდებით და პატივს მივაგებთ იმ სიწმინდეს, რასაც ქართული ოჯახი ჰქვია. ეს დღე ჩვენმა დიდმა პატრიარქმა ილია მეორემ დააფუძნა და მე ძალიან მოხარული ვარ, რომ ამ ტრადიციას აგრძელებს ახალი პატრიარქი - შიო მესამე. სრულიად საქართველოს ვულოცავ ამ დღესასწაულს“, - განაცხადა საქართველოს პარლამენტში რუსთავისა და გარდაბნის ათი თემის დელეგატმა ირაკლი შატაკიშვილმა.

ტაძრიდან წამოსული მრევლი და სასულიერო პირები თავისუფლების მოედანზე შეკრებილებს შეუერთდნენ. თავისუფლების მოედნიდან კი მასშტაბური მსვლელობა მოეწყო, რომელსაც წინ სასულიერო პირები, სტიქაროსნები და ქართულ ნაციონალურ სამოსში გამოწყობილი ბავშვები და ახალგაზრდები მიუძღოდნენ.

„დღევანდელმა ერთობამ კიდევ ერთხელ დაგვანახა, რამდენად მნიშვნელოვანია ჩვენი საზოგადოებისთვის ოჯახური ღირებულებები, ტრადიციები და ეროვნული იდენტობა. განსაკუთრებით ემოციურია, რომ ამ მნიშვნელოვან დღეს ქვეყანას უკვე ჰყავს ახალი პატრიარქი. დარწმუნებული ვარ, მისი ლოცვა - კურთხევა სულიერად კიდევ უფრო გააძლიერებს ჩვენს ქვეყანას“, - განაცხადა რუსთავის საკრებულოს თავმჯდომარე მამუკა რეხვიაშვილმა.

რუსთავში ოჯახის სიწმინდისა და მშობელთა პატივისცემის დღისადმი მიძღვნილი მსვლელობა გმირთა მემორიალთან, ცურტაველის მოედანზე დასრულდა, სადაც რუსთავის ღვთისმშობლის შობის ტაძრის წინამძღოლმა - მამა ვახტანგ ყიასაშვილმა, მრევლს დღესასწაული მიულოცა და სრულიად საქართველოს კათოლიკოს-პატრიარქის, უწმინდესისა და უნეტარესის შიო მესამის მიმართვა გააცნო.

საქართველოში ოჯახის სიწმინდისა და მშობლების პატივისცემის დღე საქართველოს კათოლიკოს-პატრიარქის, ილია მეორის ლოცვა-კურთხევით, 2014 წლიდან აღინიშნება.

ინფორმაციას რუსთავის მერია ავრცელებს.