მალხაზ კობაურის საქმეზე სასჯელის დანიშვნის სხდომა 27 მარტს გაიმართება

ხადის ხეობაში  სმითების ოჯახის სამი წევრის  მკვლელობაში ბრალდებული მალხაზ კობაურის საქმის პროკურორის, ზაზა დათუკიშვილის განცხადებით, ბრალდების მხარე სასჯელის დანიშვნის სხდომაზე  უვადო თავისუფლების აღკვეთას დაუჭერს მხარს.

პროკურორის განცხადებით, ყველა წარდგენილ ბრალდებაში ნაფიცმა მსაჯულებმა გადაწყვეტილება ერთხმად გამოიტანეს.

„აქვე მინდა განვმარტო, რომ ბუნებრივია, ეს არ იყო მოულოდნელი გადაწყვეტილება. ბრალდების მხარე იმ დღიდან, როდესაც პასუხისგებაში მიეცა მალხაზ კობაური, აღნიშნავდა, რომ საქმეზე მოპოვებულია არაერთი მტკიცებულება, რომელიც ერთობლიობაში ცალსახად ადასტურებდა, რომ აღნიშნული დანაშაული მალხაზ კობაურმა ჩაიდინა“, - განაცხადა ზაზა დათუკიშვილმა.

პროკურორის განმარტებით, ნაფიცმა მსაჯულებმა მალხაზ კობაური დამნაშავედ ცნეს ბრალდების მხარის მიერ წარდგენილ ყველა ბრალდებაში.

„მინდა მადლობა გადავუხადო ნაფიც მსაჯულთა სასამართლოს თითოეულ წევრს, ამ შემადგენლობას, ვინაიდან მართლაც ღირსეულად შეძლეს და შეასრულეს მათზე დაკისრებული მოვალეობა და საამაყოა, რომ ჩვენ გვყავს საზოგადოების ასეთი ღირსეული წევრები. ასევე მინდა აღვნიშნო, რომ სხდომაზე დაცვის მხარემ შესთავაზა ნაფიც მსაჯულებს ალტერნატიული ვერდიქტი, რომელიც გულისხმობდა, რომ კობაური გამართლებულიყო ჩვენ მიერ წარდგენილ ყველა ბრალდებაში და გამტყუნებულიყო დანაშაულის შეუტყობინებლობაში, რადგან დაცვის მხარე ავითარებდა ვერსიას, თითქოს ის მხოლოდ შეესწრო ამ დანაშაულს, ხოლო მკვლელობა არ ჩაუდენია“, - აღნიშნა პროკურორმა.

სასამართლო სასჯელს ოთხშაბათს გამოაცხადებს. „რაც შეეხება სასჯელის ნაწილს, 27 მარტს, 12:00 საათზე ჩანიშნულია სასჯელის დანიშვნის სხდომა, სადაც მოსამართლე გამოაცხადებს სასჯელს. ვინაიდან ჩადენილია უმძიმესი დანაშაული, მოკლულია სამი ადამიანი, მათ შორის 4 წლის ბავშვი, მოტივი ამ დანაშაულის არის შეუწყნარებელი და გაუგონარი, ბრალდების მხარეს მიაჩნია, რომ ერთადერთი სამართლიანი სასჯელი იქნება უვადო თავისუფლების აღკვეთა და სასჯელის დანიშვნის სხდომაზე ჩვენ მხარს დავუჭერთ უვადო თავისუფლების აღკვეთას”, - განაცხადა პროკურორმა.

ხადის ხეობაში სმითების ოჯახის სამი წევრის მკვლელობაში ბრალდებულ მალხაზ კობაურს ნაფიცმა მსაჯულებმა გამამტყუნებელი ვერდიქტი გამოუტანეს. კობაური ნაფიცმა მსაჯულებმა წარდგენილ ყველა ბრალში ერთხმად დამნაშავედ ცნეს, მათ შორის - გაუპატიურებაში.

მალხაზ კობაურს ბრალი სისხლის სამართლის კოდექსის 109-ე მუხლის პირველი ნაწილის „გ“, მე-2 ნაწილის „ბ“, მე-3 ნაწილის „ა“ და „ბ“ ქვეპუნქტებით და 137-ე მუხლის პირველი ნაწილით ჰქონდა წარდგენილი, რაც განზრახ მკვლელობას სხვა დანაშაულის გაადვილებისა და დაფარვის მიზნით, სამი პირის განსაკუთრებული სისასტიკით მკვლელობას, წინასწარი შეცნობით არასრულწლოვნის მიმართ მკვლელობასა და გაუპატიურებას გულისხმობს. აღნიშნული დანაშაული 16-დან 20-წლამდე, ან უვადო პატიმრობას ითვალისწინებს.

ნაფიცი მსაჯულების გადაწყვეტილება მოულოდნელი იყო მალხაზ კობაურის ადვოკატისთვის, ალექსანდრე კობაიძისთვის.

„ჩვენ გვქონდა შესაძლებლობა, დასკვნითი სიტყვისთვის წარმოგვეჩინა ბრალდების მხარის ვერსიები; ბრალდების მხარის სისუსტეები, რომლებიც გამოძიების ეტაპზე არსებობდა, მაგრამ ეს არის ჩვენი რეალობა - ნაფიცმა მსაჯულებმა სამწუხაროდ, გაიზიარეს ის ვერსია, რომელსაც ამ შემთხვევაში ბრალდების მხარე აჟღერებდა. ახლა გვრჩება პროცესუალური გზა, რომ გავასაჩივროთ ეს უკანონო გადაწყვეტილება საკასაციო წესით და ვიდაოთ იმ მნიშვნელოვან ფაქტორებზე, რაც არის პროცესუალური დარღვევები. იმედი გვაქვს, სააპელაციო პალატა ამ ყოველივეს გულისყურით მოეკიდება. არსებობს საფუძველი, მინიმუმ ჩვენი საქმე გადაიხედოს, რადგან პროცესუალური დარღვევები იყო ამ საქმესთან დაკავშირებით“, - თქვა ალექსანდრე კობაიძემ.

რაც შეეხება მსჯავრდებულის დედას, მარიამ მარტიაშვილი ამბობს, რომ ნაფიცმა მსაჯულებმა ეს გადაწყვეტილება იმიტომ მიიღეს, რომ პროკურატურის მხრიდან ზეწოლის ქვეშ იყვნენ.

„ძალიან კარგად იცოდა პროკურატურამ, რაც ხდებოდა აქ, მაგრამ ამერიკას როგორ აწყენინებენ, აბა ქართველი ყოფილიყო და ის მოეკლათ. მე ყველაფერს მოველოდი ამათგან. რა უნდა ვთქვა, შოკში ვარ, სირცხვილი მართლა საქართველოს“, - თქვა მარიამ მარტიაშვილმა.