გენერალ ქუთათელაძის ოჯახმა „იმედის კვირას“ ვიდეო მიაწოდა, სადაც მკვლელობაში ბრადებული ჩანს

გენერალ სამსონ ქუთათელაძის ოჯახმა "იმედის კვირას" გენერლის გახმაურებულ მკვლელობამდე სათვალთვალო კამერით გადაღებული ქუჩის ვიდეოკადრები მიაწოდა. ვიდეო 2018 წლის 15 იანვარს, რუსთავის ე.წ. სტამბოლის ბაზარში, გენერლის მკვლელობამდე სამი საათით ადრეა გადაღებული. კამერის ობიექტივში ქუთათელაძის მკვლელობაში ბრალდებული გიორგი ჭანტურია 12:14 წუთზე მოხვდა - მუქი ფერის ქურთუკით და ნაქსოვი  ქუდით. ვიდეოჩანაწერი 15-წუთიანია. 

გენერლის მკვლელობის შემდეგ გადაღებულ კადრებში ასევე ჩანს, რომ შემთხვევის ადგილზე სხვებთან ერთად ბრალდებული გიორგი ჭანტურიაც იმყოფება, თუმცა ტყავის ქურთუკი აცვია და ქუდი აღარ ახურავს. 

მოკლული გენერლის მეუღლისთვის ეს ვიდეოჩანაწერი ერთ-ერთი მტკიცებულებაა იმისა, რომ სამსონ ქუთათელაძე გიორგი ჭანტურიამ მოკლა. შემდეგ მკვლელობის მთავრი მტკიცებულებები იარაღი და ტანსაცმელი გაანადგურა ან გადამალა. 

რამდენიმესაათიან ინტერვალში ტანსაცმლის გამოცვლას ბრალდებულის ადვოკატი  წვიმიანი ამინდით ხსნის. ბექა ბასილაია ამბობს, რომ ტანსაცმლისა და ავტომობილის ექსპერტიზა უკვე ჩატარდა და ჭანტურიას დანაშაულის კვალი არსად იკვეთება. 

ის, რაც განსაკუთრებული და საეჭვო არ არის ბრალდებულის ადვოკატისთვის, ერთ-ერთი უტყუარი მტკიცებულებაა გამოძიებისა და მოკლულის ოჯახისთვის. ქუთათელაძეების ადვოკატი დეტალურად საუბრობს იმ ვიდეო მასალებისა და მოწმეთა ჩვენებების შესახებ, რომელიც გენერლის მკვლელობის 20-ტომიან საქმეში დევს. ლევან ზაქრაძე ამბობს, რომ მკვლელობის დღეს ბაზრის ადმინისტრაციული შენობისკენ სამსონ ქუთათელაძის და გიორგი ჭანტურიას გადაადგილება კამერებმა და მოწმეებმაც დააფიქსირეს.

ერთ-ერთი მოწმე, რომელზეც ადვოკატები საუბრობენ ირაკლი თედორაძეა. ის პირველად 2018 წლის იანვარში დაკითხეს. მეორედ - შვიდი თვის შემდეგ. განმეორებით ჩვენებაში და სასმართლო პროცესზეც, თედორაძემ თქვა, რომ დაინახა სამსონ ქუთათელაძის კაბინეტიდან გამოსული გიორგი ჭანტურია, რომელსაც იარაღი ეჭირა. რატომ მისცა ორი განსხვავებული ჩვენება ამის გარკვევა "იმედის კვირამ" მოწმესთან სცადა, თუმცა ირაკლი თედორაძე სახლში არ დახვდა.

ირაკლი თედორაძის მიერ ჩვენების შეცვლას  პროკურატურა გამოძიების პროცესში ახალი გარემოებებით ხსნის. უწყების ინფორმაციით, მოწმეთა პირდაპირი ჩვენებები, საგამოძიებო მოქმედებათა ოქმები, ვიდეოჩანაწერები, და ექსპერტიზის დასკვნები მხოლოდ გიორგი ჭანტურიას დანაშაულზე მიუთითებს.  

გენერალ სამსონ ქუთათელაძის მკვლელობაში ბრალდებული გიორგი ჭანტურია გამოძიებამ პირველად მკვლელობიდან მეორე დღეს დააკავა, მაშინ ჭანტურიას 40-საათიანი პატიმრობა ბრალის წარდგენის გარეშე, გათავისუფლებით დასრულდა. ის განმეორებით რვა თვის შემდეგ ქუთათელაძის მკვლელობისა და იარაღის უკანონო შეძენა-შენახვისთვის დააკავეს. მაშინ გამოძიებამ განმეორებითი ჩხრეკისას ჭანტურიების საცხოვრებელი სახლიდან 3 ცეცხლსასროლი იარაღი, 500 ვაზნა და 24 მჭიდი ამოღო. 

დაკავებიდან მალევე გავრცელდა აუდიოჩანაწერიც, რომელიც ახლა საქმეში ერთ-ერთ მტკიცებულებაა. აუდიო ჩანაწერში ბრალდებული გიორგი ჭანტურიას და მარიამ ჭანტურია, მის მეგობარს, საპატრულო პოლიციის თანამშრომელს ესაუბრება. ამ აუდიო ჩანაწერიდან ირკვევა, რომ ჭანტურიების სახლში იარაღი ინახებოდა. ჭანტურიების ოჯახი ამტკიცებდა, რომ ჩანაწერი დამონტაჟებული იყო, სახლში იარაღი კი სამართალდამცველებმა ჩაუდეს. 

გენერალი სამსონ ქუთათელაძე 2018 წლის 15 იანვარს ე.წ სტამბოლის ტერიტორიაზე საკუთარ კაბინეტში მოკლეს. მოკლულის მეუღლე  პირველივე დღიდან აცხადებდა, რომ მკვლელი გიორგი ჭანტურია იყო. მკვლელობის მოტივად კი ფინანსურ დავას ასახელებდა. გენერალსა და ბრალდებულს შორის არაერთგზის კონფლიქტი სტამბოლის ბაზრის დირექტორმა მამაუკა ცხოვრებაძემაც დაადასტურა.  

სასამართლო პროცესები ახლა დაცვის მხარის მოწმეების დაკითხვით გრძელდება. თუ საქმეზე განაჩენი 1 თვეში არ დადგება, გიორგი ჭანტურიას პროცესებზე სიარული სასჯელაღსრულების დაწესებულებიდან აღარ მოუწევს. 9-თვიანი წინასწარი პატიმრობის ვადა მას 8 მაისს იწურება.