გომელაური პანკისის მოვლენებზე: სად რა გაიპარა, ამის ანალიზს გავაკეთებთ

„სად რა გაიპარა, ამის ანალიზს გავაკეთებთ. ამის შემდეგ ვიტყვით, რომ ვთქვათ - ეს იყო შეცდომა, ან არ იყო შეცდომა, ან ძალოვნების შეცდომა იყო, თუ ვისი შეცდომა იყო. აქედან გამომდინარე, გავაკეთებთ ანალიზს“, - განაცხადა პარლამენტში ჟურნალისტებთან სახელმწიფო უსაფრთხოების სამსახურის ხელმძღვანელმა ვახტანგ გომელაურმა პანკისის ხეობაში 21 აპრილს განვითარებულ მოვლენებზე.

გომელაურის თქმით, პლენარულ სხდომაზე, რომელიც დახურულ რეჟიმში მიმდინარეობდა, საუბარი შეეხებოდა უსაფრთხოების საკითხებს. მისივე თქმით ისაუბრეს პანკისზეც.

რაც შეეხება პანკისში განვითარებულ მოვლენებზე პასუხისმგებლობის საკითხს, გომელაურმა განაცხადა, რომ ეს არ იყო დაგეგმილი სპეცოპერაცია: 

„ეს არ იყო დაგეგმილი სპეცოპერაცია, რომ გათვლილი ყოფილიყო, ასე მოხდებოდა, თუ ისე მოხდებოდა. თემა იყო, შევიდა სამშენებლო კომპანია, რომელსაც შეჰყვა რამდენიმე, 30-35 კაცი პოლიციელი და მას შემდეგ რაც მოხდა, დაძაბვა - უკვე ამის შემდეგ მოხდა განსაკუთრებულ დავალებათა დეპარტამენტის შეყვანა. ეს იყო სულ“.

ვახტანგ გომელაურის თქმით, შემდეგ ის, თუ როგორ განვითარდა იქ თემა, უნდა გაანალიზდეს:

„ანუ, პირობითად, უფრო მეტი უნდა შეგვეყვანა განსაკუთრებულ დავალებათა დეპარტამენტი, სადღაც უნდა გამოსულიყვენენ, შესულიყყვნენ და ა.შ - ეს სხვა თემაა. ამის ანალიზია გასაკეთებელი. რა თქმა უნდა, ცუდი ფაქტი მოხდა . რა თქმა უნდა, ჩვენც ჩართულები ვიყავთ, იმიტომ, რომ ერთი მიმართულებაა. ქვეყნის უსაფრთხოებაზე ჩვენც ვზრუნავთ, ასევე ჩვენ შინაგან საქმეთა სამინისტროს გარეშე ვერაფერ გავაკეთებთ. ერთი ორგანიზმი ვართ, ხაზს უსვამ ამ მიმართულებას შინაგან აქმეთა სამინისტროს და უსაფრთხოების სამსახურს. ის, რომ ჩვენ არ ვიყავით ჩართულები, ან ისინი არ იყვნენ თემაში, რა თქმა უნდა, ჩართულები ვიყავით“, - განაცხადა გომელაურმა.

21 აპრილს პანკისის ხეობაში მოქალაქეებმა ჰესის მშენებლობა გააპროტესტეს. პროტესტს პოლიციასა და აქციის მონაწილეებს შორის დაპირისპირება მოჰყვა. სპეცრაზმმა აქციის მონაწილეების წინააღმდეგ ცრემლმდენი გაზი გამოიყენა. 

ხეობაში მომხდარი დაპირისპირების გამო სამედიცინო დახმარება 55 ადამიანს გაეწია, მათ შორის 38 პოლიციელსა და 17 ადგილობრივს. შსს-მ პანკისის ხეობაში პოლიციელებზე თავდასხმისა და პოლიციის ტექნიკის დაზიანების ფაქტზე გამოძიება დაიწყო.