მალხაზ მაჩალიკაშვილი სუსში მივიდა

მალხაზ მაჩალიკაშვილი საქართველოს სახელმწიფო უსაფრთხოების სამსახურში გამოკითხვაზე მივიდა.

როგორც მაჩალიკაშვილმა ჟურნალისტებს განუცხადა, ის დაკავებას არ ელოდება. “დაკავებას არ ველოდები , რადგან მე არაფერი ჩამიდენია, არანაირი მცდელობა არ მქონია. დასაკავებელი მაგათ ბევრი ადამიანი უზით იქ, რომლებიც დამნაშავეები არიან მთელი ქისტების წინაშე, სისხლით აქვთ ხელები გასვრილი", - განაცხადა მაჩალიკაშვილმა. 

კითხვაზე, იმყოფებოდა თუ არა მისი ძმისშვილი სოფელ მაჩხაანში, რადგან ამის კადრები არსებობს, მაჩალიკაშვილი პასუხობს: “არ იმყოფებოდა. როცა ვნახავ კადრებს, მერე გავცემ პასუხს. თუ იცოდნენ, ჩასული იყვნენ, ფაქტზე დაეკავებინათ. ეს არის ჩემ მიმართ ანგარიშსწორება და მცდელობა იმისა, რომ გაანადგურონ თემირლანის სამართალი. დღევანდელი ხელისუფლება მებრძვის ერთ ადამიანს“, - განაცხადა მაჩალიკაშვილმა

ადვოკატის თქმით, მალხაზ მაჩალიკაშვილს ბრალი არ აქვს წაყენებული და ის გამოკითხვაზე მოწმის სტატუსითაა მისული. ბრალის წარდგენის შემთხვევაში დაცვის მხარე სასამართლოს წესით მაჩალიკაშვილის დაკითხვას მოითხოვს.

"ვიდრე ჩვენ პასუხებს გავცემთ გამომძიებლების შეკითხვებს, მოვითხოვთ ყველა მტკიცებულებას. შევაფასებთ ამ მტკიცებულებების ავთენტურობას მისი წარმომავლობას, თუნდაც ჩანაწერის. აუცილებლად შემოწმდება, ჩანაწერი რამდენად უწყვეტია, რამდენად სწორი თარგმანია, რამდენად ვეთანხმებით ამ თარგმანს და მოვითხოვთ ალეტრნატიულად თარგმანს.

გამორიცხული არ არის დააკავონ, თუმცა შინაგანი რწმენა და მოლოდინი მაქვს, რომ არ დააკავებენ. ამ ეტაპზე არსებული მტკიცებულებების გათვალისწინებით და ჩემი ინფორმაციით, მალხაზის დაკავება არ არსებობს. მოწმის დაკითხვის წესს ითვალისწინებს სისხლის სამართლის კოდექსის 114-ე მუხლი, რომლის მიხედვით, დაცვისა და ბრალდების მხარეებს თანაბრად შეუძლიათ მოითხოვონ მოწმის მაგისტრანტი მოსამართლის თანდასწრებით დაკითხვა. თუმცა მალხაზ მაჩალიკაშვილი დღეს აქ არ გამოცხადებულა როგორც მხარე. მას ბრალი არ აქვს წარდგენილი. იგი აქ არის მოწმის სტატუსით. მოწმე არ არის მხარე პროცესში და შესაბამისად, ვერ მოვითხოვთ მის დაკითხვას მაგისტრანტი მოსამართლის თანხლებით. თუ მას ბრალს წაუყენებენ, გვექნება საშუალება ავიცილოთ ის კითხვები, რომლებიც არარელევანტურია და არ არის შემხებლობაში საქმის ფაქტობრივ გარემოებებთან. ამავდროულად ავიცილებთ იმ ემოციურ ფონს, რომელსაც მალხაზ მაჩალიკაშვილი ამ შენობაში შესვლის შედეგად იღებს", - განაცხადა მარიამ კუბლაშვილმა.

7 მაისს სახელმწიფო უსაფრთხოების სამსახურმა ფარული აუდიოჩანაწერი გაასაჯაროვა, რომელშიც გამოძიების მტკიცებით, მალახაზ მაჩალიკაშვილი თავის ძმისშვილს ტერორისტული აქტის მომზადებას ავალებს. ამ საქმეზე მალხაზ მაჩალიკაშვილის ძმისშვილი დაკითხეს, თავად მაჩალიკაშვილი კი ჩანაწერს ფაბრიკაციას უწოდებს.