პოლიციამ აგარაში კაცის მკვლელობაში და ცოლის დაჭრაში ბრალდებული დააკავა

პოლიციამ აგარაში კაცის მკვლელობის ბრალდებით ერთი ადამიანი დააკავა. როგორც თვითმხილველები ჰყვებიან, მსხვერპლი კაცი აფთიაქში შევიდა და გამოსვლისას მას თავს დაესხა გვერდით კორპუსში მცხოვრები ადამიანი.

"ყვიროდა: "მიშველეთ მკლავენ"-ო. მეზობლებმა დახმარება სცადეს, თუმცა თავდამსხმელი აგრესიული იყო. თავდამსხმელმა კაცს 16 ჭრილობა ცივი იარაღით მიაყენა და გაიქცა", - ჰყვებიან ადგილობრივები. 

არსებული ინფორმაციით, მან მეუღლის მეგობარი კაცი მოკლა, მეუღლე კი დაჭრა.

შსს-ს განცხადებით, ოპერატიულ-სამძებრო და საგამოძიებო მოქმედებების შედეგად, 1966 წელს დაბადებული ა.ხ. განზრახ მკვლელობისა და დამამძიმებელ გარემოებაში ჩადენილი განზრახ მკვლელობის მცდელობის ბრალდებით დააკავეს. დანაშაული 16-დან 20 წლამდე ვადით ან უვადოდ თავისუფლების აღკვეთას ითვალისწინებს.

გამოძიებით დადგინდა, რომ ბრალდებულმა დაბა აგარაში, აღმაშენებლის ქუჩაზე, ეჭვიანობის ნიადაგზე, ცივი იარაღით სასიკვდილო ჭრილობა მიაყენა 1978 წელს დაბადებულ ზ.გ.-ს, რომელიც ადგილზე გარდაიცვალა. ამის შემდეგ, ა.ხ.-მ იმავე ცივი იარაღის გამოყენებით, მეუღლეს - 1970 წელს დაბადებული ლ.დ.-ს საკუთარ საცხოვრებელ სახლში სხეულზე დაზიანებები მიაყენა.

შსს-ს ცნობით, დაჭრილი ქალი სასწრაფო სამედიცინო დახმარების ჯგუფმა საავადმყოფოში გადაიყვანა, სადაც შესაბამისი დახმარება გაეწია. გამოძიება განზრახ მკვლელობის, ასევე, ორი ან მეტი პირის და ოჯახის წევრის მიმართ დამამძიმებელ გარემოებაში ჩადენილ განზრახ მკვლელობის მცდელობის ფაქტებზე, საქართველოს სსკ-ს 108-ე მუხლით, 11 პრიმა 19-109-ე მუხლის მე-2 ნაწილის „ვ“ ქვეპუნქტით და მე-3 ნაწილის „ა“ ქვეპუნქტით მიმდინარეობს.