დაბა წაღვერთან კაცის მკვლელობის შესახებ ახალი დეტალებია ცნობილი

წაღვერთან 60 წლამდე აკაკი პაპიძე საკუთარ მანქანაში მოკლული მისმა მეუღლემ იპოვა. როგორც მზია ხარატიშვილმა "ქრონიკასთან" თქვა, მანქანა სავაჭრო ჯიხურად ჰქონდათ გადაკეთებული და ღამით თავად ბორჯომში მიდიოდა სახლში, მისი ქმარი კი მანქანაში რჩებოდა. დღეს დილით კი ქალს უთხრეს, რომ მანქანა გარედან დაზიანებული იყო.

ადგილზე მისულ ქალს კაცი გარდაცვლილი დახვდა, მას დაზიანება თავის არეში ჰქონდა მიყენებული. 

ხარატიშვილისთვის უცნობია რა გახდა მკვლელობის მოტივი. ის ამბობს, რომ თანხა არ წაუღიათ და 120 ლარი კვლავ ჯიბეში ჰქონდა მის მეუღლეს.

"ნასვამები იყვნენო ამბობენ, ბაკურიანელები ყოფილან. ალბათ მანქანის წაყვანა ან აკუმულატორის ამოცლა უნდოდათ და ეს შეეწინააღმდეგა", - ამბობს ხარატიშვილი. მისივე ინფორმაციით თავდამსხმელებმა მოგვიანებით ბენზინგასამართ სადგურზეც იჩხუბეს.

მეზობლები მოკლულს დადებითად ახასიათებენ და ამბობენ, რომ ის უკონფლიქტო იყო.

წაღვერში ბენზინგასამართ სადგურზე "რეპსოლი" ადასტურებენ, რომ გამთენიისას 05:30 საათზე საწვავისთვის მისულმა სამმა ახალგაზრდამ თანხის გადახდაზე უარი თქვა და სადგურის თანამშრომელს ფიზიკური შეურაცხყოფა მიაყენა.

"95 ლარის ბენზინი ჩაასხეს და გადახდაზე უარი თქვეს. ჩემმა თანამშრომელმა მოსთხოვა გადაეხადათ მანქანის კარი გააღო, ისინი გადმოხტნენ და სცემეს, წიხლები ურტყეს. ნასვამები და აგრესიულები იყვნენ", - ამბობს ბენზინგასამართი სადგურის თანამშრომელი. 

სამართალდამცველებმა ვიდეოკამერების ჩანაწერები უკვე ამოიღეს. ბენზინგასამართი სადგურის თანამშრომელი გამოკითხვაზე ბორჯომის პოლიციაშია.

დაბა წაღვერთან მომხდარი მკვლელობის ფაქტზე გამოძიება სსკ-ის 108 მუხლით დაიწყო, რაც განზრახ მკვლელობას გულისხმობს. პოლიციამ მკვლელობა დანაშაულის ჩადენიდან რამდენიმე საათში გახსნა, მიმდინარეობს ინტენსიური საგამოძიებო-ოპერატიული ღონისძიებები. ცხედარს ახალციხის პროზექტურაში ექსპერტიზა უტარდება.